JSMP husu PN Kria Lei Espesifiku Ba Kazu Insestu

Judicial System Monitoring Program (JSMP) husu ba Parlamentu Nasional (PN) atu kria espesifiku ida kona ba krime insestu, tanba durante uza deit Lei Kodigu Penal ba abuzu seksual ba menor, enkuantu kazu insestu akontese barak liu iha rai laran.

“Ami nia rekomendasaun katak presiza elabora opsaun legal hanesan interpretasaun ba pozisaun sira ne’ebe eziste ona iha kodigu penal, lei violensia domestika no lei protesaun ba sasin atu asegura prosesu la’o tuir nia fatin inklui elabora legislativu mak altera lei kodigu penal, se lae kria lei espesifiku ida ba asuntu insestu ne’e ami nia opiniaun,” rekomenda Diretor Ezekutivu JSMP, Luis de Oliveira Sampaio, (01/08), bainhira lansa relatorio krime insestu, iha Hotel Ramelau, Aimutin, Dili.
Bazeia ba estudus kazu insestu ne’ebe JSMP liu husi VSS no Unidade Justisa ba Feto (WJU) hala’o iha rai laran hatudu katak hahu Janeiru 2010 to’o Junu 2012 labarik feto minoridade 49 mak sai vitima ba kazu insestu.

Alende ne’e JSMP mos husu ba governu atu aumenta rekursu ba Tribunal sira no servisu Ministerio Publiku no hasae kapasidade autor justisa atu enkargu no sentensa arguidu sira ne’ebe halo krime seksual, iha meus ne’ebe konsistente no apropridu tanba dala barak autor justisa sira hamonu sentensa ne’ebe la adekuadu tuir kazu ne’ebe JSMP halo estudu.

Iha parte seluk Membru Parlamentu Nasional, Deputada Virginia Ana Belo katak iha lei kodigu penal iha artigu balun mak preve ona kona ba abuzu seksual ba minoridade, maibe nia implementasaun la’o ladun diak,no sempre adia ba beibeik.

“Iha segundu legislatura sira tenta atu kria lei espesifiku ida ba kazu insestu maibe ho tempu ne’ebe limitadu la konsege, maibe hau hanoin ida ne’e ideias diak ida ami sei koko koalia ho sosiedade sivil sira atu hare ba asuntu ida ne’e,” dehan Deputada Belo.

Deputada ne’e mos sujere ba instituisaun relevante atu halo sosializasaun no advokasia ne’ebe maka’as ba iha komunidade sira liu-liu iha area remotas, tanba kazu insestu akontese tanba autor sira laiha konesementu kona ba sira nia hahalok ne’ebe sira halo ba sira nia oan feto, tiun ba subrina no seluk tan.