- Publika iha: 19 Fevereiro 2013
Desde uluk to’o agora moras TBC kontinua rejistu as iha Klinika Bairo-Pite kompara ho sira seluk tanba loron ida sira bele atende ema nain lima ba leten mak afeta moras ne’e.Tuir Diretor Klinika Bairo-Pite (KBP), Doutor Daniel Murphy katak Timor oan barak mak afeta moras TBC tanba barak mak sei moris vulneravel liu no mos tanba ambiente ne’ebe foer.
“Moras TBC mosu no da’et lalais ba ema seluk tanba ita nia kondisaun hela fatin agora ne’e la do’ok, hela rabat malu liu tanba ne’e anin tama la di’ak no wainhira ema ida hetan moras sempre da’et lalais ba ema barak, tan ne’e ha’u husu ba komunidade hotu bainhira mear liu semana rua tenki mai hala’o tratamentu lalais para la bele da’et ba ema seluk ,” dehan Diretor KBP Doutor Daniel Murphy, (06/02), iha Bairo-Pite, Dili.
Tuir Doutor Dan, atu hamenus moras TBC iha rai laran tenke kria rede ida ho monitor sira iha suku idak-idak hanesan iha Rotutu,Asulau,Tutuala no sira seluk tan, atu nune’e bele atende lalais ba ema sira ne’ebé mear iha suku idak-idak tanba fatin sira ne’e iha rural sira la rona buat ida kona-ba saúde.
“Kria postu saúde iha suku-suku idak-idak para wainhira ema mear ir abel fo atendementu,husu sira ita bo’ot mear semana tolu no koko kedas kabeen, se positive fo kedas aimoruk ba sira hodi nune’e la bele da’et ba ema seluk,” sujere Doutor Dan.
Hatan ba kestaun ne’e Ministru Saúde, Sérgio Gama Lobo dehan agora dadaun Sentru Saúde iha suku iha tiha ona hamutuk 200 maibe seidauk uja tan ne’e halo planu para atu uja deit ona.
“Ne’ebe orsamentu 2013 ne’e ami la presiza aloka tanba uma sira ne’e iha tiha ona, uluk ajensia dezenvolvimentu nasional mak kaer, portantu ADN sei ba identifika suku sira ne’ebé mak presiza uja,”dehan Ministru Saude ne’e.
Entretantu Membru Komisaun F Parlamentar,Deputadu Eladio Faculto hateten moras TBC sempre aumenta númeru tanba moras ne’e da’et lalais husi ema ida ba ema seluk.
” Tuir ha’u nia hatene klinika iha Bairo-pite ne’e moras barak mak iha ne’eba tanba ne’e se kuandu pasiente sira ne’e baisa kahur deit entaun klinika ne’e tenke melhormente,” dehan Deputadu ne’e.
Tuir nia, pasiente ho moras TBC tenke tau ketak ho pasiente ho moras seluk nune’e labele da’et sira seluk.
“Fatin ne’ebé malirin no tenke do’ok husi komunidade, tanba ita nia rai ne’e agora manas los no klinika mos besik liu komunidade entaun atu hamenus ne’e susar,”dehan Deputadu Faculto.