- Publika iha: 27 Junho 2023
Diretora Ezekutivu Invest People (IP), Carmen Araújo hateten sira foti inisiativa realiza semináriu ho tema “Ha’u”, Ha’u Fiar, Ha’u Bele, Ha’u Halo, Ha’u Merese iha universidade sira, ho objetivu atu fanun joven sira ida-idak tenke muda sira-nia hanoin no hahalok atu sai joven ne’ebé iha hanoin diferente no ativu liutan hodi kontribui ba dezenvolvimentu nasaun nian, tanba presiza sidadaun sira ho mentalidade pozitivu hodi lori Timor-Leste ba futuru ida ne’ebé nabilan.
Nia dehan tinan 20 ona Timor-Leste hetan nia independénsia, maibé sosiedade sei kontinua hanoin hanesan vítima ba funu, sei moris iha ki’ak nia laran no aranja razaun oioin hodi kontinua hateke ba kotuk. Ne’e hanoin ida ne’ebé la favorese ona, loos Timor-Leste sofre durante tinan 24 no agora tenke hateke ba oin hodi lori Timor-Leste ba futuru ida ne’ebé furak liu.
“Semináriu ida-ne’e serve para ema atu komprende oituan se mak sira no oinsa ita-nia hanoin funsiona atu ita bele iha hanoin ida ne’ebé favorável lori ita sai ema ida ne’ebé ita hakarak hodi atinji buat ida ne’ebé ita hakarak,” nia hateten hafoin partisipa iha CICLO Semináriu kona-ba Ha’u iha Universidade Oriental Timor Lorosa’e (UNITAL), iha Becora, Díli.
Nia hateten Timor-Leste mehi atu sai hanesan nasaun Singapura, mak presiza joventude ne’ebé mais ativu, iha hanoin diferente tanba ema ho hanoin diferente mak bele ativu no marka diferensia.
Nia konsiente atu sai ema ida lori tempu naruk, maibé tenke hahú agora kuda mentalidade ne’ebé diferente no krativu hodi hateke dezafiu sira hanesan oportunidade di’ak atu hakat ba oin.
Nia enkoraja joventude sira atu hahú hanoin halo buat ruma ne’ebé fó impaktu ba sira-nia aan, família no nasaun tanba ema susesu bo’ot, barak iha mundu agora sira hahú negósiu ho fundu ne’ebé ki’ik tebes.
Nia informa sira sei halo mós semináriu ne’e iha universidade sira seluk atu lori ema susesu sira hodi fahe esperiénsia hodi enkoraja joven sira no muda sira-nia hanoin atu hahú halo buat ruma ba sira-nia aan no nasaun.
Entretantu, Nain ba Elisabeth House of Beauty, Emprezaria Elisabeth Gusmão Oliveira hateten hahú negósiu ne’e tanba paisaun, entaun halo esforsu tomak hodi hetan abilidade no finanseiru hodi hahú negósiu ida-ne’e iha rai-laran.
Nia dehan dezafiu ne’ebé hasoru iha inisiu mak merkadu ba makiajen ka makeup iha rai-laran laiha, entaun difisil tebes. maibé ho paixaun no fiar loron ida sei bele bo’ot.
“Agora ha’u iha oportunidade loke beauty class ba timoroan ne’ebé laiha osan ba to’o ema nia rai aprende, sira bele estuda iha ne’e de’it,” nia hateten.
Nia hateten iha fulan Dezembru tinan 2023, sei loke kursu makiajen ka makeup ba timoroan sira ne’ebé hakarak aprende.
Iha parte seluk, Decano Fakuldade Ekonomia, iha UNITAL, Profesór Davil Coelho sujere atu kontinua atividade ne’e iha universidade sira no ensinu sekundáriu sira atu bele fó hanoin no motiva sira hateke ba oin.
“Atividade ne’e labele para de’it iha universidade, ba mós universidade seluk no ensinu sekundáriu sira atu motiva sira no fó hanoin ba sira,” nia hateten.