- Publika iha: 29 Agosto 2023
Prezidente Autoridade Munisípiu Díli, Guilhermina Filomena Saldanha hateten tinan 2022, sira asina ona akordu ida ho União das Cidades Capitais de Língua Portuguesa (UCCLA), iha Portugal, ne’ebé parseria ho Asosiasaun Emprezarial Muller Timor-Leste (AEMTL) hodi fó formasaun empendedorizmu ba feto sira no loke konkursu planu negósiu inovativu ba joven feto sira atu enkoraja sira envolve iha vida emprezariál.
Nia dehan atividade formasaun empendedorizmu no konkursu ne’e sei fó de’it ba feto no joven feto sira iha munisípiu Díli, atu ajuda sira hamriik rasik no sira bele kontribui ba dezenvolvimentu ekonomia família nian hodi redús violénsia doméstika.
“Ita hotu hatene katak, Díli ne’e sentru sidade ne’ebé ema hotu-hotu mai iha ne’e ho 240,000 abitante, ho númeru feto barak liu. Entaun tempu ona Autoridade Díli hakas aan liuhusi ita-nia Asosiasaun Emprezarial Muller Timor-Leste atu ajuda,” nia hateten hafoin asina akordu ho UCCLA no AEMTL, iha Matadoru, Díli.
Nia hateten joven feto sira ne’ebé iha ideia negósiu inovativu sei hetan kapitál inisiu ba negósiu, ne’ebé hetan akompañamentu husi AEMTL no iha mós oportunidade atu hola parte iha grupu joven feto sira iha grupu CPLP.
Nia hatutan programa ida seluk mak formasaun língua-portugeza ba funsionáriu sira, tanba hanesan funsionáriu públiku iha estatutu tenke promove língua ofisiál.
Nia informa programa sira-ne’e hetan apoia fundu husi Uniaun Europea ho montante hamutuk euro milliaun 3 ho durasaun implementasaun atividade to’o 2025.
Enkuantu, Presidente Asosiasaun Emprezarial Muller Timor-Leste (AEMTL), Hergui Luina Fernandes Alves hateten parseria ne’e ba programa rua mak ideia Díli Inovar, ne’ebé loke ba joven ho idade tinan 15 até 25.
“Manan na’in 20 ne’ebé di’ak liu ne’e sei hetan formasaun husi AEMTL no IADE atu fó kapasitasaun empendedorizmu no apoia sira organiza sira-nia planu negósiu no prepara sira ba kompetisaun.
Ultimu husi kompetisaun ne’e na’in neen ne’ebé di’ak liu, sei hetan prémiu ho persentajen kapitál inisiál atu halo negósiu. Ba sira seluk ami sei akompaña nafatin atu sira konklui planu negósiu hodi aplika ba fundu sira ne’ebé kapital finanseiru husi banku,” nia hateten.
Nia hateten programa sira ne’ebé halo iha Díli, sei fó mós benefísiu ba AEMTL no fó oportunidade ba feto empendedorizmu sira iha Timor-Leste.
Nia hatutan parseria ida-ne’e mós sei ajuda sira hadia promosaun, advokasia no kria kooperasaun ho organizasaun sira iha Portugal.
Iha parte seluk, Enkarregada Negósiu Delegasaun Uniaun Europeia iha Timor-Leste, Dorthe Wacker hateten papél importante ne’ebé empreza ki’ik no médiu sira ba dezenvolvimentu ekonomia família no nasaun nian.
“Empreza ki’ik no médiu sira-ne’e sai hanesan parte importante ba ekonomia hodi funsiona di’ak no bele fornese empregu no kondisaun moris ba ema no kria kresimentu ekonómiku,”nia hateten.