- Publika iha: 11 Abril 2014
Membru Parlamentu Nasional sujere ba Ministeriu Solidariedade Sosial (MSS) sosa tan kareta funeral nian, atu nune’e bele fasilita diak liutan atendementu ema mate sira, tanba numeru kareta ne’ebe mak agora dadauk iha sei menus.
“Nune’e bele fasilita ema mai husi distritu ne’ebe mate iha Dili hodi lori mate isin to’o iha sira nia hela fatin,” Deputadu Antonio Serpa Ximenes, iha Parlamentu Nasional.
Deputadu ne’e hateten, kareta funeral importante tebes atu aumenta tanba povu ne’ebe laiha kbi’it sira presiza apoia husi governu.
“Povu ne’ebe iha kbi’it ida-idak bele lori ninian mate isin ba, maibe ida ne’ebe laiha kapasidade husu ita tenke atende,” Deputadu Serpa hateten.
Deputadu ne’e realsa orsamentu jeral estadu 2012 nian tau duni sosa kareta maibe seidauk sufisiente.
“Tinan ida ne’e sira mos tau tan osan sosa kareta para bele fasilita ema ne’ebe mate mai husi diastritu,”Serpa hato’o
Entretantu Deputadu Manuel Gaspar, hateten kareta funeraiu at mak barak, tanba durante ne’e laiha manutensaun .
“Tinan-tinan ita bele aloka osan ba kapital menor atu sosa ida ne’e sosa ida ne’eba, maibe ita laiha vontade atu hadia sasan,” Deputadu Gapsar preokupa.
Deputadu ne’e dehan, dala barak governu hola sasan barak maibe laiha manutensaun entaun sasan sira ne’e para hotu iha lixu.
Hatan ba preokupasaun ne’e, Ministra Solidariedade Sosial (MSS), Isabel Amaral Guteres, katak iha tinan kotuk (2013) MSS hola kareta funerariu hamutuk neen no tinan ne’e sei sosa tan kareta hat.
Ministra Guteres, hateten total orsamentu ba sosa kareta funerariu inklui aloka ba bolsa da mae, veteranus no dezastre naturais ne’e hamutuk milaun $130 resin ne’ebe tama iha tranferensia publika MSS nian.
“Kareta hat ne’e ami sei tau iha fatin ne’ebe seidauk hetan kareta funerariu iha area remotas,” nia hateten.