- Publika iha: 14 Abril 2014
Koordenadora Uma Mahon Forum Komunikasaun Feto Timor -Leste (FOKUPERS), Judit da Conceição Ribeiro, hateten oan husi vitima insestu difisil hetan sakramentu batismu, tanba sei ran maluk.
Nia hateten, durante ne’e FOKUPERS tenta dala barak ona halo aprosimasaun ho Amo sira, oinsa mak labarik hirak ne’e bele simu batismu. “maibe Padre balun la simu situasuan ida ne’e,” Koordenadora Ribeiro hateten, iha Farol, Dili.
Dalabarak mos, nia dehan, FOKUPERS fasilita vitimas hasoru direitamente ho Padre no Madre balun hodi esplika situasuan ida ne’e, no ikus mai (tinan kotuk) labarik nain tolu mak konsege simu sakramentu batismu, iha Igreja Aimutin, Dili.
“Ami iha duni kazu insestu ne’ebe difisil atu hetan sakramentu baptism, pirmeiru tanba kestaun ran moe malu (aman ho oan) ida ne’e kazu ne’ebe susar tebes,” nia hateten.
Problema seluk ne’ebe FOKUPERS infrenta, mak kona ba tau naran labarik nia aman iha sertidaun batismu susar oituan no liu husi diskusaun ne’ebe naruk, ikus mai deside tau aman deskonesidu nia naran.
“Nune’e labele fo impaktu ba dezenvolvementu labarik ne’e iha future,” nia dehan.
Nia mos husu ba ema hotu atu simu kondisaun ida ne’e iha sosiedade le’et, tanba insesttu akontese la’os vitima nia hakarak e ne’e hanesan asidente ida, vitima labele defende an.
Entretantu ativista Direitus Humanus, Xisto dos Santos, konsidera ne’e violasaun direitus humanus ida tanba labarik sira iha direitu atu hetan sakramentu baptism, nudar sarani Katoliku.
“Ne’e ita komete violasaun ida inklui igreja rasik no
“Instituisaun saida deit inklui igreja ne’ebe mak iha intensaun atu ingnora oan sira ne’ebe vitima, ne’e viola ona sira nia direitus humanus, ne’e situasaun mak obriga,” nia dehan.
Aliened ne’e nia dehan, oan sira husi military Indonezia (okupasaun iha Timor –Leste) mos dalaruma susar atu hetan dokumentus legal, hanesan sertidaun batismu, RDTL no seluk tan.