- Publika iha: 03 Julho 2014
Polisia Estasaun Becora kaptura tan ema nain hitu ne’ebe fa’an kupon SDSB ho illegal iha suku Becora, distritu Dili no submete kedas ba Ministeriu Publiku hodi prosesu ba iha Tribunal Distrital Dili.
Iha akuzasaun Ministeriu Publiku ne’ebe le’e sai husi juis prezidente, katak iha 25 Marsu 2014, tuku 19:30 otl, polisia estasaun Becora simu informasaun husi fontes konfirmadu, katak iha Becora Klinika nia kotuk arguido sira setor hela osan kupon SDSB ba patraun ho inisial SDS.
Hafoin ne’e, ekipa investigasaun Polisia Estasaun Becora tun kedas ba fatin refere, no iha altura ne’eba polisia kaer kedas arguido nain 7, enkuantu patraun ba jogu ne’e halai tiha.
Iha julgamentu iha Tribunal Distrital Dili (TDD), arguido nain hitu ne’e nain lima hili nonok, no nain rua MA no EC mak fo sira nia deklarasaun.
Arguido MA deklara, katak, iha momentu ne’eba nia entrega kupon ulun 20 (20 kepala), ho total osan hamutuk $287, kupon tahan ida ho folin $0,75 cents no kada semana fa’an dala tolu.
Nia rekonese, katak kupon ne’e Singapura nian no jogus ne’e illegal duni, maibe nia fa’an nafatin tanba dezempregu.
Iha fatin hanesan arguido EC presta deklarasaun ba tribunal, katak akuzasaun ne’e los hotu.
Iha altura ne’eba nia setor kupon ulun walu, ho total osan $40 dolar, tanba nia rasik foin semana rua halo servisu ida ne’e.
Depois rona tiha deklarasaun husi parte rua, juis prezident aplika pena prizaun tinan ida no suspende ba tinan ida ho balun ba arguido nain rua MA ho EC, enkuantu arguido nain lima seluk hetan pena prizaun tinan rua no suspende ba tinan rua ho balun.