Sexta, Março 29, 2024
Total visitors: 766366

Membru Parlamentu Nasional konsidera grupo agrikultores ne’ebe fa’an hand tractor ne’ebe Ministerio Agrikultura e Peskas (MAP) fo apoia ba sira ne’e krime no presiza halo investigasaun, tanba ne’e sasan estado nian.

Deputadu Manuel Gaspar Soares da Silva, hato’o kestaun ne’e tanba nia simu keixa husi agrikultor balun iha sub-distritu Uato-Lari, distritu Viqueque fa’an traktor.

“Responsabel grupo agrikultor balun fa’an hand tractor iha Viqueque,” Deputadu da silva levanta iha plenaria, iha Parlamentu Nasional.

Tuir nia, tuir kontratu ne’ebe hateten, katak traktor hirak ne’e sei iha kontratu laran, sira imprest deit no seidauk sai propriedade privadu ga grupo. “Ne’e krime tenke submete ba iha justisa,”. 

Nia haktuir MAP tenke halo intervensaun emediata ba problema ida ne’e tanba ohin loron tempu ba agrikultor sira halai natar. 

“Agora tempu halai natar sira ba buka traktor laiha tiha ona no responsabel mos laiha mai tiha Dili,” Dehan Deputado Gaspar Iha Plenaria. 

Nia hatutan problema ida ne’e laos agrikultor sira mak sala maibe failansu husi Ministerio Agrikultura e Peskas nian tanba entrega handtraktor sira ne’e ba grupo la halo sosializasaun antes no la estabelese regras ida hodi kesi grupo agriklutura sira. 

Entertantu, Presidente Komisaun D (Ekonomia e Dezenvolvimentu) deputada Jacinta Abucau Pereira hateten iha feskalizasaun komisaun nian iha baze la identifika kazu hanesan ne’e tanba ekipa hasoru malu deit ho autoridade local sira la hasoru malu direita ho komunidade sira. 

“Ami nia feskalizasaun durante ne’e ami seidauk rona direitamente husi extensionista no administardor sira katak responsabel grupo agrikultura faan traktor ne’ebe distribui husi governu,” dehan Nia. 

Deputada ne’e mos husu atu membru grupo agrikultura sira ne’ebe nia responsabele faan traktor ne’ebe distribui husi governu aprejenta dadus. 

Hatan ba kestaun ida ne’e Ministru Agrikultura e Peskas (MAP), Mariano Asanami Sabino hateten antes halo distribuisaun traktor sira ne’e ba iha grupo agrikultura sira iha konkordansia ho grupo sira katak traktor sira ne’e imprestimu deit laos atu sai propriadade privadu ema ida nian no iha mos regulamentu balun. 

Ministru Asanami husu ba agrikultor sira ne’ebe hasoru problema ne’e aprejenta dadus atu Ministerio bele halo intervensaun sala resolve tuir lei. 

“Kuandu Sala ita laiha direitu atu interven servisu Tribunal nian,” Ministru hateten.