- Publika iha: 23 Dezembro 2014
Organizasaun naun governmental Judicial System Monitoring Program (JSMP) halo sosializasaun ba Lei Kontra Violensia Domestika (LKVD) iha distritu neen (6), liu-liu iha eskola sira.
Diretor Ezekutivu JSMP, Luis Oliveira Sampaio, hateten programa ne’e sei la’o nafatin, liu-liu ba isu ne’ebe mak hetan ona problema kona ba violensia domestika, JSMP sei halo sosializasaun kona ba lala’ok problema nia hun.
“Ami tama kuaze estudante nivel distritu hanesan Lospalos, Liquiza, Ermera, Maliana, Same inklui Viqueque no fatin sira ne’ebe mak tuir ami nia tarjetu tenke tama hotu,”Diretor JSMP Sampaio, hateten iha Dili.
Nia dehan, JSMP planu ona ba iha distritu Oe-Cusse halo treinamentu ba komunidade ho estudante sira kona ba lei kontra violensia domestika nian, atu nune’e sira mos iha konsementu kona ba asuntu ida ne’e.
Entretantu Estudante Universidade Oriental Timor Lorosa’e (UNITAL), Fakuldade Direitu, Jose Fernandes, apresia ho programa JSMP nian sosializa LKVD ba estudante sira.
“Ema barak hetan torturasaun iha uma laran, maibe la hatene dalan oinsa atu bele hato’o keixa to’o nasional, dala barak iha area rurais liu-liu ema kbi’it laek sira hetan violensia domestika, sira la hatene dalan,” nia dehan.
“Dala barak sira lori deit ba autoridade lokal resolve,”.
Maibe nia dehan, ho sosializasaun ida ne’e sira bele iha konesementu karik loron ruma akontese violensia domestika ba sira ga familia, sira hatene ona dalan atu hato’o keixa.
Entretantu membru Komisaun G (etika), Deputada Angelica da Costa, hateten to’o agora sei kontinua akontese violensia domestika maske iha ona LKVD, tanba falta de informasaun.
“Ami komisaun G ba halo peskiza iha distritu to’o sukus, deskobre katak kazu violensia domestika sei as, tanba povu barak laiha konesementu,” nia dehan.