- Publika iha: 23 Dezembro 2014
Fundasaun Decolores Del Amor (FDA) sujere ba governu atu estabelese Konselho Nasional Droga hanesan instituisaun independente ida hodi fo atensaun ba asuntu droga ne’ebe oras ne’e dadaun buras iha rai laran.
Membru Fundasaun Decolores Del Amor, Xisto Gonçalves, hateten estado iha obrigasan atu kria kondisaun ne’ebe apropriadu hodi kombate droga iha rai laran, tanba droga measa bo’ot ida ba futuru Timor –Leste nian.
“Ami rekomenda estabelese lalais konselho nasional ba droga nian,” Goncalves sujere, iha salaun Asosiasaun HAK, Farol, Dili.
Nia mos husu ba Parlamentu Nasional aprova lalais lei droga atu fo legalidade ba konselho ne’e hodi haree ba asuntu Ida ne’.
Tuir nia, se estado la fo importansia ba asuntu ida ne’e, ba futuru Timor –Leste la’os deit sai fatin tranzisaun maibe sai mos nasaun konsumedor droga.
Tanba tuir nia, ho situasaun dezempregune’ebe dadaun ne’e iha, fasil atu halo influensia liu –liu joven inklu mos lideransa balun.
Nia dehan, divulgasaun informasaun ne’e importante tebes ba komunidades, liu-liu ba autoridade lokal sira bele kontribui kombate droga iha rai laran.
“Rede droga agora dadaun eziste ona iha Timor –Leste, tanba realidade iha tribunal sira komesa julga ona kazu droga nian iha tinan hira ikus ne’e,” nia dehan.
Nia mos dezafia ho sistema kontrolu iha area fronteiras sira hanesan aero, terestre no marina, tanba realidade droga tama mai tiha mak polisia detekta fali.
Iha parte seluk, membru Parlamentu Nasional, Deputadu Antoninho Bianco, hateten la presiza estabelese konselho nasional ba droga, maibe importante mak haforsa servisu iha fronteiras.
“Ita lalika hanoin harii instituisaun bar-barak, haforsa deit servisu sira ne’ebe iha ona, fo meus ne’ebe diak ba instituisaun sira ne’ebe iha ona hanesan ekipamentus deteksaun atu sira bele servisu efetivu liu tan,” Deputadu Bianco sujere.
Tanba tuir nia, instituisaun estado nian barak mak estabelese, maibe ladun la’o ho diak, maibe la taka dalan ba futuru bele kria instituisaun ida ne’e, bainhira iha preparasaun rekursu humanus no ekipamentus kompletu ona.