- Publika iha: 04 Fevereiro 2015
Governu seidauk bele harii sentru rehabilitasaun ba labarik konflitu ho lei iha tinan 2015 ne’e, tanba sei iha faze preparasaun ba iha dezenhu inklui BOQ ba projetu ne’e.
Vise Ministru Justisa, Ivo Jorge Valente, hateten Ministerio Justisa sei preve orsamentu hodi halo konstrusaun ba obra ne’e iha orsamentu jeral estado 2016, tanba obra ne’e projetu bo’ot.
“Tinan ne’e ami sei halo kalkulasaun orsamentu hodi hatama ba komisaun revizaun orsamentu iha 2016 nian,” Vise Ministru Valente hateten, iha Colmera Dili.
Tuir planu, nia dehan, sentru ne’e sei halo konstrusaun iha tinan 2016 ho orsamentu tinan oin nian iha Tibar “ kompleta ho fatin formasaun, konselhu inklui fasilidade atu sira bele dezenvolve sira nia mental,”.
Maske seidauk iha fatin rehabilitasaun espesifiku ba labarik sira ne’ebe konflitu ho lei, maibe nia hateten, Ministerio Justisa (MJ) liu husi diresaun nnasional prizionais prepara fatin espesifiku iha prizaun Becora hodi detein labarik sira ne’e.
Iha parte seluk, Diretor Prizaun Becora, Joao Domingos, hateten durante ne’e prizioneirus moris ho hakmatek, tanba sira iha sela espesifiku ba juvenil sira, la hamutuk ho adulto sira.
Nia hatutan, agora dadaun iha prizoneiru juvenil hamutuk nain 28 mak detein hela iha sela Becora, tanba komete krime hanesan mos ema adulto sira.
“Husi 28 nain 22 mak hetan ona dezisaun final prevnetiva iha nain 5 agora prosesu hela no nain ida mak medida seguransa tanba sofre moras mental halo hela tratamentu,” nia hateten.