- Publika iha: 10 Março 2015
Membru Parlamentu Nasional (MP), Prezidente Komisaun F ( saude, edukasaun, kultura, desportu, veteranus no igualdade jeneru), Deputadu Virgilio da Costa Hornai, husu ba Ministerio Edukasaun (ME) tenke halo avaliasaun ba universidade ne’ebe sei uza lian Indonesia hodi hanorin iha prosesu aprendizajen, tanba la’os lian ofisial Timor nian.
Liu-liu nia dehan, universidade ne’ebe akreditadu tiha husi governu, maibe kontinua uza lian Indonezia iha aula, tanba profesores tuir ona formasaun barak kona ba lian Portugues.
“Hau husu ba ministeriu edukasaun bandu kedas universidade ne’ebe hala’o aprendizajen ho lian Indonezia, tanba lian ne’e uza hanesan lian trabalhu nian la’os hanorin iha eskola,” Deputadu Hornai sujere, iha Parlamentu Nasinal.
Tanba tuir nia, iha universidade balun uza lian Indonezia hanorin iha aula e ida fo impaktu ba estudantes sira bainhira akaba sira nia estudu.
Iha fatin seluk estudante Universidade Oriental Timor-Lorosa’e (UNITAL), Jose Antonio, rekonese katak UNITAL to’o agora kontinua uza lian Indonezia iha aprendizajen.
“Materia hotu-hotu, husi semester III to’o semester VIII uza deit lian Indonezia, tanba dosente barak majestrado Indonesia nian,” Antonio hateten.
Nia reforsa, katak durante ne’e UNITAL uza deit lian rua (Tetun ho Indonezia) iha prosesu aprendizajen no labele uza lian Portugues tanba dosentes ne’ebe hanorin iha eskola ne’e maioria la hatene Portugues.
Hatan ba kestaun ne’e Diretor Jeral do Servisos Corpotivos Ministeriu Edukasaun, Antoninho Pires, katak ministerio implementa ona kursu lian portugues ba professores ho dosentes desde tinan 2013.
“Ne’ebe dosente sira uza bahasa Indonezia ne’e, hanesan lian introdusaun ba estudante sira oinsa mak sira bele komprende liafuan seluk iha lian Portugues,” nia hateten.
Tanba ne’e nia parte garante katak dosentes sira hatene hotu lian ofisial Tetun ho Portugues hodi hanorin ba estudantes.