- Publika iha: 17 Novembro 2015
Organizasaun Saude Mundial (OMS) entrega ekipamentus emergensia (tenda, kama no seluk tan) ba Ministerio Saude hodi fo asistensia saude ba komunidades bainhira mosu dizastre ruma.
Diretor Rejional OMS Regiaun Sudeste Aziatiku, Poonam Khetrapal Singh, hateten ekipamentus Medikal kamp kit ne’e intervensaun importante ida ne’ebe organizasaun saude mundial halo hodi responde ba situasaun emergensia.
“Uza hanesan fasilidade saude provizoriu fo konsulta no halo tratamentu, no fornese atendimentu nafatin iha fatin ne’ebe fasilidade saude hetan estragus,” Singh hateten, hafoin entrega ekipamentus ne’e ba iha Ministra Saude Timor –Leste, Maria do Ceo Sarmento, iha Ministerio Negosio Estrangeirus, Praia dos Quoqueiros, Dili.
Nia hatutan, ekipamentus ne’e mos hanesan fatin kritiku ida atu fo asistensia saude ba komunidades durante rekoperasaun ba sistema saude.
Medical Camp Kit ne’e, nia dehan, kompostu husi tenda unidade ba sala ket-ketak ; hanesan sala konsulta pasiente enkaminamentu ida, sala ba pasiente, fatin partu, sala pesoal saude, haris fatin (feto no mane), tanke bee inklui mos solar panel atu hafunsiona refrijerador ida no lampu iha tenda hotu.
Alende ne’e, Logistiku Saude Medical Camp Kit, Prahlad Dahal, hateten aimoruk iha kaixa 16 mak prepara ba situasuan emergensia nian.
“Aimoruk baziku sira hanesan amoxicilin, mitrodinazole, azitrhomycin, bandage-cotton, oral rehydration salt, remethan no seluk tan,” Dahal hateten.
Nia dehan, aimoruk hirak ne’e atu atende deit ba situasaun emergensia, karik akontese dizastre naturais ruma, hanesan rai monu, rai nakdoko, bee sa’e no seluk tan.