Governu presiza monta mediku iha fronteira

Iha peskiza Fundasaun Mahein (FM) nian kona ba polisia fronteira nia servisu no kondisaun, sira identifika katak, durante ne’e membru Unidade Polisia Fronteira (UPF), liu-liu iha Batugade bainhira moras laiha mediku ida mak fo tratamentu ba sira e sira hasai osan rasik hodi trata sira nia moras.
“Sira tenke la’o do’ok husi sira nia postu ba iha klinika iha Maliana ou iha fatin seluk ne’ebe maka sira bele ba,” hateten Diretor FM, Nelson Belo, (06/06), iha Balide, Dili.

Tuir nia, kodisaun hanesan ne’e lolos labele akontese tanba iha unidade mediku iha polisia nia laran, e tenke koloka ba iha fatin ne’eba.
Entertantu  Segundu Komandante Polisia Nasional Nasional Timor-Leste (PNTL), Komisariu Afonso de Jesus, rekonese katak seidauk iha klinika ida ba sira, maibe sira bele konsulta iha klinika ne’ebe besik ho sira nia fatin.

“Hau hanoin iha fronteira mos dala ruma fatin balu laiha duni asesu hanesan klinik dalaruma laiha ne’eba, maibe iha fatin balun besik, ne’e duni hau hanoin wainhira senti  moras bele ba klinika sira ne’e ou tenke informa ba nia komandante,” dehan Komisariu de Jesus.

Tuir nia, Komandante BPU sei tau matan ba ida ne’e, bainhira iha membru balun moras, sira labele hasai sira nia osan rasik, e ba future sei koko atu tau unidade Polisia Mediku balun iha ne’eba.