SEOP Sei Hadia Estrada Iha Hatulia

Estrada iha Hatulia, Distritu Ermera ne’ebe aat, governu liu husi Sekretariu Estadu Obras Publiku (SEOP) promote sei hadia, nune’e populasaun sira iha fatin ne’e bele asesu ba iha merkadu ho diak.
“Ami sei tau matan ba asuntu ida ne’e, karik la’os iha tempu badak ne’e maibe ami sei hare no atu hadia, tanba ami iha mos orsamentu atu halo manutensaun,” dehan Engenering Estrada SEOP, Jose Agustu,(10/07), iha nia knar fatin Mandarin, Dili.

Nia hatutan, kona ba atu hadia estrada rurais nian, SEOP servisu hamutuk ho kompania Hilo ne’ebe durante ne’e kaer projeitu ida ne’e.
Entertantu Deputadu Paulo Martins dehan, governu mak troka malu maibe makina estadu nian kontinua la’o.

“Diretor sira iha obras publika bele tau matan ba estrada sira ne’e, tanba ita mos iha ona ekipamentus para atu bele mobiliza hodi tau lalais atensaun ba estrada sira ne’ebe maka at hanesan iha Hatulia ne’e,” dehan Deputadu Martins.

Tuir nia, wainhira kuandu la hadia estrada sira ne’e, difikulta komunidade iha area ne’eba atu halo movimentu ba fatin seluk.