Vicente Guterres Prezidente Parlamentu Nasional Foun ho Votus Afavor 40

Eis Vise Prezidente Parlamentu Nasional (PN) durante Segunda Lejislatura, Deputadu Vicente Guterres eleitu atu sai Prezidente PN ba Terseira Lejislatura (31/7) ba tinan lima 2012-2017 ho votus afavor 40.

Deputado Guterres eleitu hafoin Deputadu 65 halo votasaun ba lista uniku Prezidente PN ho vota afavor 40, kontra tolu (3), abstensaun hitu (7), branku 13 no votus nulu rua (2).
Iha nia diskursu ba dahuluk, Prezidente-eleitu PN Vicente Guterres dehan nia sei halao nia knar ho diak tuir rejimentu ne’ebe iha no husu mos ba Deputadu sira atu kumpri sira nia funsaun ho diak hodi servi nasaun no povu Timor-Leste hotu.

Alende ne’e iha plenaria ne’ebe diriji husi Prezidente sessante PN, Deputado Fernando Lasama de Araujo, halo mos subtituisaun ba Deputadu sira hosi partidus politikus ne’ebe sei retira aan hosi parlamentu atu kaer pozisaun politika ho razaun atu nune’e deputadus seluk bele halo juramentu dala ida hodi hala’o sira nia knar nudar reprezentante povu iha PN.

Tuir Prezidente PN sesante de Araujo votasaun hodi hili Prezidente PN foun ne’e la’o ho diak, “ida ne’e mak Demokrasia, e ita hotu fo parabens ba ita nia prezidente eleitu foun e espera katak iha tinan lima mai bele lori netik mudansa iha Uma Fukun ida ne’e.”