Trabalhadores Estranjeirus 4.135 Servisu iha TL Ho Vistu Trabalhu husi SEFOPE

Total trabalhadores husi estranjeiru ne’ebe hala’o servisu tantu negosiu no servisu seluk tan iha rai laran ho vistu trabalhu husi Sekretariu Estadu Formasaun Profesional e Empregu (SEFOPE) hamutuk 4.135.
“Ami hare katak kada tinan vistu mai husi estranjeiru kuaze atus rua ba leten liu-liu husi nasaun Cina, Indonezia, inklui Thailand no seluk tan, sira sei halo aplikasaun ba SEFOPE kona ba servisu espesialista ne’ebe sira iha, tanba tuir lei trabalhadores estrangeiru ne’ebe iha direitu atu hetan vistu trabalhu mak sira ne’ebe manager ba leten, se la’os manager sei labele hetan,” informa Diretor Jeral SEFOPE, Jacinto Gusmao, (31/07), iha Sentru Konvensaun Dili.

SEFOPE liu husi Inspeksaun Jeral du Trabalhu mos sei halo inspesaun ba trabalhador estranjeiru ne’ebe mai halo servisu iha rai laran la ho vistu.
Iha area 12 mak trabalhadores estranjeiru sira labele tama mak hanesan sai Guarda, Motorista, Kasir, Servidor Restorante (pelayan resto) no Rental sira maibe sei iha balun ne’ebe servisu sub-subar hela.
“Ekipa sira mos durante ne’e aplika ona multa ba trabalhadores estranjeiru sira ne’ebe servisu la ho vistu,” Diretor Jeral ne’e tenik.

Iha parte seluk Prezidente Konfederasaun Sindikatu Timor-Leste (KSTL), Jose da Conceicão da Costa husu ba governu atu kria regras konkretu ida ne’ebe maka’as kona ba sistema fo vistu ba trabalhadores estranjeiru.

“Ita presiza trabalhadores estranjeiru mai servisu iha ita nia rain maibe ema ne’ebe espesialista duni ba tekniku ka servisu ne’ebe Timoroan sira seidauk bele halo, ne’e ami kondorda maibe sira 4.135 ne’e hetan ona vistu trabalho husi SEFOPE mak halao servisu hanesan kahur masa, kasir, sofer, hein loja ne’e labele,” dehan Prezidente KSTL ne’e.

Tuir nia, kuandu SEFOPE fo vistu arbiru deit ba trabalhadores estranjeiru sira ne’e, signifika governu la fo atensaun ba joventude Timoroan sira, liu-liu sira ne’ebe hetan ona kapasitasaun.
Tanba ne’e husu ba Inspeksaun Jeral atu halo inspesaun hodi sai-tama kompania sira atu kontrola trabalhadores estranjeiru sira nia vistu.