Labarik Minoridade 49 Sai Vitima Ba Krimi Insestu

Tuir dadus husi Judicial System Monitoring Program (JSMP) durante Janeiru tinan 2010 to’o Junu 2012 total labarik feto ne’ebe sai vitima ba krimi insestu kazus hamutuk 49 e husi numeru ne’e kazus 9 mak hetan ona finalidade iha tribunal.
“Maioria vitima husi kazu insestu mak labarik feto ho idade minoridade 11-14 anos, sira ne’e hetan abuzu husi membru familia ne’ebe sira fiar no depende ba,hanesan aman ba oan, tiun ba subrina no maun ne’ebe ho idade 35 ba leten,” dehan Koordenadora Unidade Justisa ba Feto (WJU), Flora Soriano, iha lansamentu relatoriu kazu insestu, (01/08), iha Sentru Konvensaun Dili.

Nia hatutan, JSMP liu husi Unidade Apoiu Legal ba Vitima (VSS) fo ona asistensia ba vitima insestu hamutuk nain 32, e kazu sia (9) mak hetan ona desizaun final husi tribunal, maioria kazu sira ne’e prosesa iha Ministeriu Publiku (MP).

Alende JSMP liu husi Unidade Justisa ba Feto (WJU) mos halo monitorizasaun ba kazu insestu 18 entre tinan 2010 to’o 2012 e kazu lima mak hetan ona finalidade husi tribunal, no tribunal fo sentensa entre tinan hat (4) to’o tinan 12 kadeia. Ho numeru ne’e hatudu total kazu krime insestu hamutuk 49 iha Timor-Leste.

“Timor-Leste nia kodigu penal laiha krime espesifiku ba insestu, maibe vitima insestu ne’ebe ho idade 14 mai kraik bele hetan protesaun housi artigu 177 kona ba abuzu seksual ba menor junta no artigu 182 kona ba agravasaun tanba relasaun familiar,” hateten Kordenadora WJU ne’e.

Iha Konstituisaun Republika Demokratika de Timor-Leste (RDTL) artigu 18 hatur ona katak labarik minoridade sira iha direitu atu hetan protesaun especial husi familia, komunidade no estadu liu-liu violasaun hotu hasoru labarik, e alende ne’e iha Konvensaun Direitu ba Labarik ne’ebe TL ratifika iha artigu 19 katak estadu presiza foti medida lejislativu, administrative no social ne’ebe apropriadu atu proteje labarik husi violasaun hotu.

Iha parte seluk Sekretaria Estadu Promosaun Igualidade (SEPI), Idelta Maria Rodrigues rekonese katak governu iha ratifika ona konvensaun direitu ba labarik, maibe seidauk fo atensaun especial ida ba kazu insestu.

“Ita la’os hare ba ida ne’e deit maibe presiza mos halo estudu barak ba asuntu ida ne’e tanba dala ruma buat ne’e akontese, tanba kauza husi ita nia membru familia ne’ebe barak e laiha uma ida ne’ebe seguru ba sira atu hela, ne’e mos problema ida ne’ebe ita presiza tau atensaun,” dehan SE Rodrigues.

Iha oportunidade hanesan Reprezentante Komisaun Nasional Direitu Labarik (KNDL), Madalena Guterres Correia dehan kazu insestu la’os deit 49, barak maibe tanba kazu ne’e relasiona ho dignidade familia nian entau dala barak familia moe no nonok deit la lori ba iha justisa formal.

“Ami mos to’o duni iha treinu hetan mos kazu hanesan ne’e (insestu) maibe barak mak taka tanba ba futuru KNDL sei nafatin kolabora ho parseiru atu halo sosializasaun no hasae konsensia ba komunidade sira konaba kazu insestu tanba so advokasai mak KNDL bele halo,” dehan Reprezentante KNDL ne’e.