Banku Mundial No IFC Hato'o Parabens Ba Timor-Leste Kona Ba Formasaun Governu Foun

Grupu Banku Mundial, hato'o parabens (08/08) ba Sr. Kay Rala Xanana Gusmão tanba hetan tomada de posse nudar Primeiru Ministru ba Kintu (V) Governu Konstitusional Republika Demokratika Timor-Leste nian ba periodu 2012-2017.

Banku Mundial salienta katak tranzisaun demokrátika ida ne’e refleta konsolidasaun demokratika no dada-aan husi frajilidade ba Republika Timor-Leste.

“Timor-Leste atinji ona rezultadu ne’ebe mak impresivu durante tinan sanulu nia laran desde independensia, tanba mortalidade infantil tuun makaas no ita haree katak iha progresu iha parte saude no edukasaun nian; ekonomia komesa forte; partisipasaun sidadania aumenta no instituisaun estadu mos hahu hametin tan,” tenik Luis Constantino, Jestor Nasional Banku Mundial iha Timor-Leste. “Maibe dezafius ba futuro sei iha nafatin no Banku Mundial sei nafatin empeñadu atu suporta Governu Timor-Leste no hakarak atu kopera hamutuk hodi bele alkansa nasaun ne’e nia objetivu ba dezenvolvimentu.”

Grupu Banku Mundial agora daudauk prepara hela nia Estratejia ba Parseira Nasional foun  (CPS) ba periodo 2012-2016. Dokumentu ida ne’e prepara liu husi konsulta ne’ebe mak Banku Mundial halo ho grupu oi-oin iha Timor-Leste, inklui lider komunitaria, Igreja, sosiedade sivil no entidades importantes seluk ne’ebe mak espresa ona sira nia interese no prioridades ba dezenvolvimentu. Estratejia ne’e sei sai nudar matadalan ba Banku Mundial nia serbisu iha Timor-Leste no mos sei aliña ho Planu Dezenvolvimento Estratejiku 2011-2030 nian.

“Kintu Governu Konstitusional Timor-Leste nian ne’e representa pasu importante ida oin ba nasaun ida ne’e,” tenik IFC nian Reprezentante Rezidente, Milissa Day. “IFC sei kontinua serbisu hamutuk ho governu foun ida ne’e hodi bele halakon obstakulu ne’ebe prevene ema halao negócio, no ajuda dezenvolve setor privadu ida ne’ebe dinamiku hodi bele kria kampu serbisu, presta serbisu ne’ebe diak no hari’i infrastrutura ne’ebe mak essensial ba povu Timorense.”