Governu Nova Zelandia Apoiu US$ 14 Milioens Ba Polisia Komunitaria

Atu Polisia Komunitaria (PK) sira bele halo sira nia servisu iha komunidade ho diak liu tan, Governu Nova Zelandia apoiu orsamentu hamutuk US$ 14 milioens.

“Agora dadaun ami hetan suporta husi nasaun Nova Zelandia, sira sei fo orsamentu hamutuk katorzi milioens atu bele aktiva liu tan Polisia Komunitaria,” hateten Segundu Komandante Jeral PNTL, Komisariu Afonso de Jesus, (06-08), iha Kaikoli, Dili.
Komisariu ne’e haktuir, uluk Asia Foundation maka fo apoiu orsamentu atu suporta atividade PK, maibe agora hetan fali ona apoiu husi nasaun seluk e espera katak PK bele halo sira nia funsaun ho diak.
Entretantu Deputada Josefa Alvares Soares, sente urgulhu tanba iha nasaun seluk maka iha esforsu atu kopera ho PNTL.

“Tanba sira mos iha hanoin ne’ebe maka diak, ativa Polisia Komunitaria atu nune’e bele responde lalais, situasaun ne’ebe maka akontese iha bairo no suku laran, hodi kria ambiente ne’ebe maka saudavel, paz, no estabilidade,” dehan Deputada Soares.

Deputada ne’e espera katak apoiu hanesan sei kontinua iha futuru tanba prezensa PK iha komunidade nia le’et importante.