- Publika iha: 24 Abril 2014
Sekretaria Estado ba Promosaun Igualidade (SEPI) sei hala’o seminariu kona ba moras kankru nian ba feto sira, atu nune’e feto sira bele prevene an husi moras ida ne’e.
SE Idelta Maria Rodrigues, hateten seminariu ida ne’e hanesan parte ida atu selebra loron mundial feto nian ne’ebe monu iha dia 08 Marsu kada tinan.
Tanba nia dehan, loron mundial feto ba tinan ida ne’e ho nia tema “inspira mudansa ba feto nia moris liu husi edukasaun no saude” hodi fo atensaun ba moras sira ne’ebe afeta ba feto sira nia saude.
“Ita hare feto barak mate tanba moras kankru, tanba ne’e ami sei halo debate espesial ida hamutuk ho Ministerio Edukasaun no Saude atu koalia kona ba prevensaun ba moras kankru ne’ebe afeta maka’as ba feto sira,” SE Rodrigues hateten, iha Kaikoli, Dili.
Tuir planu, debate especial ida ne’e sei halo transmisaun direita liu husi kanal Radio Televizaun Timor-Leste (RTTL), atu nune’e ema hotu bele hare, rona no kompriende kona ba moras kankru.
“Halo prevensaun antes, tanba moras ida ne’e nia tratamentu karun no presiza pasensia,” nia hateten.
Entretantu, membru Komisaun F (saude, edukasaun, kultura, veteranus no igualdade jeneru), Deputada Ilda Maria da Conçeicão, konkorda no apoia inisiativa ida ne’e hodi fahe informasaun ba feto maluk sira, atu sira mos bele iha konesementu.
“Feto sira presiza hatene inisiu moras ne’e oinsa, nune’e baihira sira sente moras, halo kedas tratamentu,” nia hateten.
Nia dehan, programa ida ne’e diak no importante tebes, iha fulan hirak liu ba, iha inan feto ida sofre moras kankru susun to’o iha ospital medikus sira foti liman, tanba grave liu ona.
Iha parte seluk, Prezidente GMPTL, Deputada Josefa Alvares Pereira Soares, husu ba SEPI atu fo atensaun mos ba servisu Ministerio Saude nian hodi fahe informasaun ba feto maluk sira ne’ebe hela iha area rural no dook husi fasilidade saude.
“Sira la’o dook ba asesu fasilidade saude, no sira laiha informasaun kona ba edukasaun prevensaun ba moras sira ne’ebe afeta ba sira nia saude,”nia sujere.