- Publika iha: 08 Agosto 2014
Atendementu mediku sira iha klinika Polisia Nasional Timor-Leste (PNTL) durante ne’e seidauk masimu ba iha membru polisia sira, tanba fatin klo’ot liu.
Xefe Klinika PNTL, Inspektor Abilio de Araujo, hateten iha doutor nain neen mak servisu iha klinika ne’e no kada sala iha mediku nain tolu ou hat mak iha laran fo atendementu ba pasientes.
“Klinika ne’e ba ami klo’ot liu,” Inspektor Araujo hateten, iha Kaikoli, Dili.
Situasaun hirak ne’e, nia dehan, halo doutor sira ladun comfortable hod fo atendementu ba pasientes, liu-liu pasientes sente la seguru bainhira hato’o moras ruma.
Iha tinan kotuk (2013) no tinan ida ne’e (2014), nia hateten, husi nia parte hato’o ona proposta ba Komando PNTL no Sekretariadu Estadu hodi tau matan ba asuntu ne’e.
“Foin lalais governu bolu ona hau, maibe sei hein bainhira mak atu alarga tan fatin ne’e,” Xefe Araujo hateten.
Nia informa, kuartu ne’ebe iha agora ne’e hat deit, ne’e duni fahe balun ba fatin aimoruk, fatin administrasaun, no balun ba doutor sira.
Iha lidun seluk membru Komisaun B (seguransa, defeza, negosiu estrangeirus), Deputadu Maria Lurdes Bessa, hateten asuntu hirak ne’e presiza koalia iha diskusaun Orsamentu Jeral de Estadu (OJE), nune’e parlamentu bele preve osan.*
“La’os deit fatin nia luan, maibe ekipamentus, staff professional tenke iha kondisaun diak, atu halo atendementu ba membru polisia ne’ebe hetan moras,” nia dehan.