- Publika iha: 15 Dezembro 2014
Membru Parlamentu Nasional lamentavel rona parteira sira iha Postu Saude Fatubolu sub-distritu Hatulia, Ermera sunu deit lilin no uza lampu telephone hodi fo asistensia ba inan partus sira, tanba laiha jerador.
Deputada Bendita Magno, hateten situasaun ida ne’e fo risku bo’ot ba vida inan sira nian.
“Husu ba ministerio saude atu fo netik jerador ki’ik ida ba sira atu atende inan partus sira, tanba realidade sira uja lampu telephone no sunu lilin atende inan sira partus,” Deputada Magno levanta iha Parlamentu Nasional, Dili.
Membru Komisaun F (saude, edukasaun, kultura, veteranus no igualdade jeneru),ne'e hatutan, la'os deit ahi, postu ne’e mos falta bee moos no aimoruk.
“Aimoruk kuaze 14 items hanesan paracetamol mak laiha, no suporta inan feto sira bainhira partus no emorogia (ran fakar) mos laiha,” nia dehan.
Iha parte seluk, Prezidente Grupu Feto Parlamentar (GMPTL), Deputada Josefa Alvares Pereira Soares, konsidera ida ne’e moe bo’ot ba Ministerio Saude no tenke toma atensaun sedu.
"Ne'e moe bo'ot, fasilidade saude ida uja lampra telephone leno hodi suku ema nia kanek," Deputada Soares lamentavel.
Nia hatutan, situasaun ida ne’e bele fo impaktu ba saude inan feto sira nian no sira trauma bele la vizita fasilidade saude.
“Ami tur iha ne’e ami aprova osamentu jeral do estado 2014 ho 6% ba Ministerio Saude atu haree ba kondisaun sira ne’e,” nia dehan.
Entretantu bainhira jornalista The Dili Weekly tenta konfirma asuntu ne’e ba iha Diretor Jeral Ministerio Saude, maibe la konsege tanba laiha fatin.