WHO Entrega Ekipamentus Protesaun Ebola Ba MS

Atu proteje medikus sira husi transmisaun virus ebola, World Health Organization entrega ekipamentus Personal Protective Equipment (PPE) ba Ministerio Saude hodi distribui ba iha fasilidade saude sira, tanba risku bo’ot ba sira bainhira atende pasiente ruma husi moras ne’e.

Reprejentante World Health Organization (WHO) iha Timor –Leste,dDoutor Jorge Mario Luna, hateten maske Timor –Leste risku ki’ik ba transmisaun virus ebola, maibe presiza halo antisipasaun, liu-liu ekipamentus protesaun ba pesoal saude sira, tanba virus ida ne’e daet lalais liu. 

“Ekipamentus PPE kuaze 100 resin ba ministerio saude no fo ona treinamentu ba pesoal saude sira iha Ospital Nasional Guido Valadares kona ba uja ekipamentus ida ne’e, bainhira atende kazu,” doutor Luna hateten, iha Kaikoli,, Dili. 

Alem de ne’e nia dehan, WHO mos haruka ona medikus Timor oan nain lima tuir formasaun espesifiku kona ba manegamentu virus ebola no uja ekipamentus protesaun sira iha Indonezia, nune’e  fila mai fahe fali ba medikus seluk. 

Nia hatutan, fo mos apoiu halo ona koordenasaun ho laboratorium iha India, bainhira identifika kazu ruma bele haruka sampel ba India hodi halo ezame, tanba laboratorium iha ne’e seidauk iha kapasidade atu halo teste. 

Iha parte seluk, Diretor Klinika Ospital Nasional Guido Valdares (HNGV), João Pedro, hateten parte ospital preparadu atu fo atendimentu ba kazu ebola bainhira mosu tanba iha rekursu humanu ne’ebe preparadu. 

Nia hatutan, medikus sira iha HNGV balun treinadu ona iha area da ne’e no planu sei fo tan formasaun ba medikus, enfermeirus sira iha sala emergensia atu bele responde ba situasaun ida ne’e. 

“Rekursu humanus ita preparadu ona, maibe fasilidade atu atende moras ida ne’e presiza haree,” nia hateten.

Entretantu, Diretor for Disease Control Ministry of Health, Ines Theodosia Almeida, husu ba populasaun sira atu labele paniku ho moras ida ne’e, tanba ministerio esforsu maka’as hela atu responde ba moras ida ne’e. 

“Ekipamentus sira ne’e ami distribui ona ba iha ospitais sira ne’ebe pontu entradas sira,” Almeida hateten.