Sexta, Março 29, 2024
Total visitors: 766366

Membru Parlamentu Nasional, Deputadu Manuel Castro, lamenta ho servisu Ministerio Saude nian, tanba fasilidade saude liu –liu ospital referral Baucau kontinua menus de aimoruk hodi fo tratamentu ba komunidade sira.

Deputadu Castro, husu ba Ministerio Saude (MS), tenke halo justifikasaun ba problema ida ne’e, tanba kada tinan Parlamentu Nasional aprova osan kompras aimoruk nian. 

“Ami tama iha sala emergensia, medikus sira dehan sira labele halo buat ida ba pasiente sira ne’e tanba aimoruk laiha atu atende,” Deputadu Castro levanta iha plenaria Parlamentu Nasional. 

Nia hatutan, informasaun sira ne’e bazeia ba fiskalizasaun ou vizita ne’ebe deputadu sira hala’o iha Ospital Referral Baucau (ORB) iha semana kotuk. 

Alende ne’e, nia mos lamentavel ho kondisaun ORB ne’ebe la premite ona atu halo atendimentu saude ba komunidades, tanba fatin klo’ot no udan been mos tama. 

Preokupasaun hanesan hato’o husi komunidade Anito da Costa, katak problemas falta aimoruk la’os deit iha ORB, maibe fasilidade saude iha Dili laran mos laiha aimoruk.

“Ami moras ba fasilidade saude aimoruk laiha, entaun medikus sira haruka fali dehan semana oin, entaun ami tenke halai ba sosa iha apotik sira,” komunidade ne’e lamenta.

“Ida ne’e triste bo’ot ida ba ami nudar povu.” 

Tuir  nia, ida ne’e akontese tanba laiha koordenasaun ne’ebe diak entre pesoal sira iha baze ho nasional inklui mos seidauk iha armagen ne’ebe adekuadu iha munisipiu sira hodi rai aimoruk, entaun aimoruk sentraliza iha nasional.

Entretantu Diretor Jeral ORB, Eugenio Soares, ne’ebe kontaktu via telefone, rekonese kestaun ne’e, maibe item balun deit mak laiha. 

“La’os aimoruk hotu laiha ne’e la’e, se aimoruk laiha ami la halo atendementu ba pasientes e ami haruka sira fila,” Diretor Jeral ORB, Soares hateten.

Tanba ne’e, nia husu ba membru Parlamentu Nasional atu labele jeneraliza situasaun aimoruk iha ORB, tanba prosesu atendementu ba pasientes agora dadaun la’o normal hela.