- Publika iha: 12 Setembro 2015
Diretora Servisu Autonomo Medikamentus e Ekipamentus Saude (SAMES), Odete Maria Belo, hateten provizoriamente aimoruk stok out ne’e responsabilidade Ministerio Saude nian, e SAMES nia knar halo distribuisaun no produs relatoriu prosesu tenderizasaun hotu iha ministerio saude nia kompetensia.
Maske la fo informasaun klaru kona ba items aimoruk ne’ebe stok out iha armagen, maibe nia rekonese, katak iha aimoruk esensial no vital balun mak stok out (laiha) no sira halo ona relatoriu ba ministerio atu kompras.
“Ami nia knar mak halo distribuisaun, e pedidu ne’ebe fasilidade saude sira hatama ami distribui tuir items ne’ebe laiha, ami halo karta ba ministerio atu sosa,” Diretora SAMES Belo hateten, bainhira hola parte iha selebrasaun loron mundial Hepatitis iha ospital nasional Bidau, Dili.
Nia hatutan, tuir indikador ministerio saude nian tinan kotuk stok out aimoruk labele liu husi 15% maibe importante mak ministerio iha orsamentu ida hodi responde emergensia ba nesesidade fasilidade saude sira.
Iha parte seluk Diretor Nasional Apoiu Ospitalar e Enkaminamentu Ministerio Saude (MS), Horacio Sarmento, hateten prosesu tenderizasaun ba aimoruk no konsomoveis la’o ona, maibe tarde kuaze fulan tolu tanba komisaun sei halo avaliasaun.
“Tanba ne’e ami sei resolve ho osan $5 mil sosa responde ba fasilidade saude sira, maibe difikuldade mak aimoruk items balun iha apotik sira Dili laran ne’e laiha,” nia preokupa.
Nia hatutan, prosesu tenderizasaun tolu mak iha MS hanesan tenderizasaun ba kompras aimoruk, laboratorium (reazente) no makina fase ran (haemodealisis), tender kompra consomoveis prosesu iha Comisaun Nasional Aprovizionamentu (CNA), tanba kustu bo’ot.
Nia mos hatutan, tinan kotuk ministerio saude kontratu ho kompania Kimia Farma Indonesia, maibe kontratu ne’e remata ona iha fulan Maio tinan 2015.