- Publika iha: 01 Outubro 2015
Diretora Ezekutivu organizasaun Fundasaun Alola, Alzira Reis, hateten sira estabelese ona grupo Suku Hadomi Inan ho Oan (SHIO) iha munisipios hitu hodi halo kampanha no sosializasaun ba komunidade area rural kona ba importansia saude inan ho oan no nutrisaun.
Nia dehan, iha grupo SHIO 64 mak estabelese ona iha munisipio Baucau, Lautem, Liquisa, Ermera no seluk tan, e sira nia papel mak ajuda governu halo sosializasaun ba komunidades kona ba saude inan ho oan, importansia susu been exclusive, malnutrisaun no seluk tan.
“Promove susu been inan nian, nutrisaun, no oinsa detekta malnutrisaun sedu, atu sira bele identifika rasik no refere ba iha instituisaun relevantes hodi halo tratamentu,” Diretora Reis hateten, iha nia fatin Mascarenhas, Dili.
Nia hatutan, grupo ida ne’e mos servisu hamutuk ho Ministerio Saude (MS) liu –liu apoiu pesoal saude sira halo program SISCa (Servisu Integradu Saude Comunitaria) fahe informasaun ba komunidade kona ba informasaun saude sira hotu.
Programa ne’e, nia dehan, iha progresu bo’ot tanba numeru inan sira fo susu been exclusive ba bebe sa’e ba 62,3% kompara ho tinan hirak liu ba no numeru malnutrisaun komesa redus, tanba komunidade iha ona konesementu ne’ebe diak.
Iha parte seluk, Membru Komisaun F (saude, edukasaun, igualdade, veteranus), Deputada Ilda Maria da Conçeicão, hateten voluntario sira ne’e nia papel importante tebes ajuda governu liu husi programa SISCa, lori besik liu tan saude ba komunidade iha area muito remotas.
“Uluk iha Laulara, administrador sira kestiona agente saude balun haruka voluntario sira tau naran no asina, maibe laiha pagamentu, agora iha suku Watu Dere postu administrative Viqueque munisipio Viqueque, fulan neen ona sira lasimu osan,” nia hateten.