- Publika iha: 23 Maio 2012
Problema HIV/SIDA, Planeamentu Familiar (PF) no Edukasaun Seksual hanesan asuntu prioridade ba Grupu Feto Parlamentar Timor-Leste (GMPTL) nian, durante mandatu tinan lima nia laranTuir Prezidente GMPTL, Deputada Josefa Alvares Soares katak, asuntu hirak ne’e importante tebes ba povu atu hatene, liu-liu feto maluk sira hodi bele evita hahalok soe bebe arbiru.
“Ami hare feto maluk barak mak kous ho idade nurak, sira presiza hatene saida mak HIV/SIDA, Planeamentu Familiar no Edukasaun Seksual,e ami GMPTL kria programa sensivel ba jeneru, kopera ho ema husi internasional no Komisaun Nasional Luta Hasoru HIV/SIDA, halo sosializasaun ba distritu ne’ebe risku ba HIV/SIDA atu hado’ok an husi virus no bele evita hahalok soe bebe arbiru deit,” dehan Prezidente GMPTL, Soares, semana kotuk (11/05), iha Parlamentu Nasional.
Iha parte seluk Diretora Rede Feto, Yasinta Luzina rekonese katak, GMPTL sira halo ona buat barak ba feto maluk sira, maibe dalabarak sira mos la foti asuntu feto nian iha plenaria.
“Hau gosta bainhira sira hamutuk iha GMPTL sira hotu haluhan tiha katak mai husi diferensia partidus politikus maibe ho deit interese ida koalia konaba asuntu feto,” dehan Diretora Luzina.
Diretora Luzina esperansa katak, iha eleisaun parlamentar agora bele aumenta numeru feto iha Parlamentu, nune’e bele fo prioridade ba asuntu feto nian ho forte liu tan.