- Publika iha: 24 Maio 2016
Desde estabelese iha 2006-2016 iha Timor-Leste, organizasaun (klinika) Marie Stope’s Internasional fo ona atendementu ba klientes hamutuk nain 249,526.
Country Director Marie Stopes Timor –Leste (MSITL), Kwesi Formson, hateten husi numeru ne’e maioria kliente sira asesu ba iha programa planeamentu familiar, tanba sira konsidera importante halo espasu ba sira nia oan.
“Durante iha ami nia servisus, ami prevene ona mortalidade inan hamutuk 57 no isin rua ne’ebe la planea hamutuk 48,310 inklui abortu la seguru hamutuk rihun sanulu resin nen,” nia hateten iha serimonia aniversaria MSITL ba dala 10, iha Lecidere, Dili.
Nia hatutan, papel MSITL nian fo informasaun ba familia sira kona ba planeamentu familiar, liu –liu esplika vantagen no disvantagen metodu kontrasepsaun ne’ebe iha.
No maioria husi klientes, nia dehan, hili liu mak metodu kontrasepsaun modernu (implant no IUD) duke natural, tanba metodu natural dala ruma sira haluha data, entaun bele isin rua.
Alende susesu, iha mos obstaklu barak mak MSITL hasoru durante tinan sanulu nia laran, nia dehan, hanesan susar tebes atu asesu ba iha area rural, tanba problema infra-estruturas no muda ema nia hanoin kona ba programa ida ne’e.
Iha parte seluk Diretora Jeral Prestasaun Servisu Ministerio Saude (MS), dotora Odete Viegas, hateten MSITL iha papel importante ajuda ministeriu hodi atinji planu estrategiku nasional governu nian, liu –liu redus taxa mortalidade inan ho oan iha Timor –Leste.
“Ita nia targetu iha 2018 tenke hatun mortalidade ba labarik sira husi 557/100.000 ba iha 260/100.000 bebe ne’ebe moris, entaun ita presiza fo espasu ba isin rua,” nia hateten.
Nia rekonese, katak sei iha obstaklu oioin ne’ebe MS no parseirus sira hasoru iha treinu, tanba ema ida-idak nia presepsaun la hanesan kona ba planeamentu familiar.