Klinika MSITL rezeita ajuda ema pratika halo abortu

Kordenadora Klinika Mari’e Stope’s Internasional iha Timor-Leste (MSITL), Fernanda Maria Serra dismente informasaun ne’ebe espalha iha komunidade nia le’et katak sira nia klinika ajuda inan isin rua sira halo pratika abortus.

Tuir nia, ida ne’e lalos no kontra lei (igreja no governu), maske ema barak mak husu duni atu halo abortus ba sira nia bebe.
“Hau atu dehan deit, ami nunka halo abortus tanba lei, kultura no igreja iha Timor-Leste la fo dalan, bele dehan illegal,  karik Mari’e Stope’s iha nasaun seluk maibe nia lei, kultura no igreja fo dalan sira bele halo iha ne’eba maibe iha Timor-Leste Mari’e Stope’s hamriik tinan lima ona nunka halo abortus,”  dehan Kordenadora Serra, (06/06), iha Vilaverde, Dili.

Kordenadora ne’e rekonese katak, iha duni inan balun mak husu atu halo abortus, tanba sira seidauk pronto atu sai inan, maibe klinika la atende no fo deit konseling no enkoraja sira atu simu realidade ne’ebe iha. “Barak mak halo tuir e ikus mai simu sira nia oan,”.

Iha oportunidade hanesan Kliente ne’ebe halo hela check up kona ba Planeamentu Familiar (PF) iha MSITL, Belmira Fernanda Soares katak, nia parte halo tratamentu planeamentu familiar iha klinika MSITL, tanba atendementu pesoal iha klinika ne’e kapas.

“Hau nudar kliente ba Klinika MSITL mai bei-beik hala’o konsulta iha ne’e, maibe hau seidauk hare pesoal sira iha ne’e ajuda inan isin rua sira halo abortus no hau mos la rona informasaun ida ne’e, tanba sira mesak Timor oan deit mak hala’o servisu iha ne’e, karik iha nasaun seluk, hau lahatene,” dehan Kliente Soares.