Domingo, Fevereiro 18, 2018
Total visitors: 196199

Sekretario Ezekutivu Komisaun Nasional Luta Kombate HIV/SIDA Timor-Leste (KNKS-TL), Daniel Marçal hateten problema transmisaun Human Immunodeficiency Virus (HIV) sai ameasa bo’ot ba rekursus humanus Timor- Leste nian iha futuru.

KNKS-TL hatete katak virus HIV/SIDA sai ameasa bo’ot ba futuru Timor-Leste ninian

Enkuantu nia dehan, populasaun Timor –Leste iha deit 1.167, 242 miloens tuir sensus uma kain tinan 2016 no kada tinan kazu transmisaun HIV foun aumenta beibeik.

Nia preokupa, tanba komunidade liu –liu iha area remota barak mak ladauk iha konesementu kona ba lala’ok prevensaun ba virus ida ne’e.

“Ita nia kultura ne’e ladun fo vantagen ba ita atu koalia livre kona ba edukasaun seksual ba ita nia komunidade, entaun ne’e risku bo’ot,” nia hateten iha kampanha edukasaun prevensaun iha Salaun Ministerio Interior, Dili.

Alende ne’e, nia dehan lingua mos sai dezafiu bo’ot ba iha komisaun atu halo sosializasaun ba komunidade sira iha rural tanba sira nia nivel komprensaun ba lian Tetun ladun diak, pior liu tan Ingles.

“Lian maternal susar tebes ba ita atu esplika ita ema nia orgaun reprodutivu ho nia funsaun sira ba komunidade, ita  nia lingua Tetun ne’e sei kiak,” nia preokupa.

Maske nune’e, nia hateten komisaun kontinua esforsu atu esplika ba komunidade sira kona ba transmisaun no prevensaun ba virus ida ne’e tanba ate agora seidauk iha aimoruk atu kura virus ne’e.

Nia hateten, komisaun mos sei asina MoU ida ho komisaun Indonesia hodi halo kampanha hamutuk iha area risku hanesan fronteiras.

Tuir dadus nasional husi Ministerio Saude husi tinan 2003-Julho 2016 registu ema na’in 600  mak pozitivu moris ho virus HIV no husi numeru ne’e nain 75 mak mate, maibe to’o fin do ano Dezembru 2016 numeru ne’e sa’e ba 642 no nain 80 mak mate ona.

Husi numeru 642 ne’e, 60% ho idade reprodutivu tinan (25-44), 28% foinsa’e ho idade 15-24, 8% idade 45 ba leten, 3% labarik ho idade tinan lima mai kraik no 1% idade 6-14.

Entretantu Responsabel Programa HIV/SIDA iha Ministerio Saude, doutor Frederico Bosco hateten ema hotu iha responsabilidade atu prevene sira nia aan husi virus ida ne’e, tanba ministeriu mesak labele halo buat ida.

“Ministerio bele iha politika ne’ebe kapas, maibe ema ida –ida la halo prevensaun ba sira nia aan, entaun susar atu kombate virus ida ne’e,” nia hateten.

Tanba ne’e, nia husu ba ema individu ka grupos ne’ebe iha ona konesementu ba lala’ok virus ida ne’e bele fahe ba seluk ne’ebe seidauk hatene atu sira mos bele prevene aan husi risku sira.

Kona ba tratamentu, nia dehan HIV seidauk iha tratamentu kurativu, maibe iha tratamentu apoiu prolonga vida no aimoruk sira ne’e disponivel iha fasilidade saude hotu.

E-mail Subscription

Enter your email address:

    Poll

    Nothing found!

    Follow us on Twitter