- Publika iha: 07 Junho 2017
Durante tinan 2016 Klinika Polisia Nasional Timor-Leste (PNTL), registu tipu moras 10 e moras infesaun respiratoriu (ISPA) mak numeru aas liu kompara ho moras sira seluk.
Diretor Klinika PNTL, Inspector Abilio de Araujo Gonsalves, hatete moras ISPA kontinua okupa numeru aas kauza husi rai rahun barak e mos tanba komunidade seiduak iha konsiensia no baruk atu hamoos lixu iha sira nia nia uma hun.
Nia hatete, tipu moras 10 ne’ebe sira konsege registu mak gastritis 276, tensaun alto 176, miagia 131, diarea 119, dermatitis 74, sacrolumbalgia 67, cepalgia 67, migrania 47, bronquitis 33 inklui ISPA ho total 597.
Nia informa, atendementu saude ne’ebe mak sira halo la’os deit ba membru polisia maibe mos ba komunidade sira.
“Sira ne’ebe mak mai halo tratamentu iha ne’e 2217 ga 21,35%,” nia hateten.
Alende ISPA, nia mos preokupa ho moras hypertensi tanba komunidade barak afeita moras ne’e.
Tanba ne’e, nia rekomenda ba komunidade atu labele konsume hahan kimiku, tanba bele fo perigu ba saude.
“Hahan ne’ebe kontaminadu ho kimiku sira labele han, ita tenke han ita nia produtu local sira,” nia dehan.
Iha parte seluk Membru Parlamentu (MP) Ilda Maria da Conceicao, rekonese moras ISPA sei domina iha sentru saude sira, tanba Timor rai rahun barak, estrada lubuk ida mak seidauk tau alkatraun.
“Hau sente ida ne’e preokupasaun bo’ot e governu presiza toma atensaun,” nia dehan.
Nia mos, sujere ba komunidade tomak atu kolabora ho governu, labele soe arbiru iha dalan, tenke rega rai, koko atu moris iha ambiente ne’ebe saudavel.