Sexta, Março 29, 2024
Total visitors: 766366

Governu Nova Zelandia prontu fo apoia ba governu Timor –Leste iha setor saude, liu –liu haforsa programa nutrisaun no kapasitasaun ba rekursus humanus iha area espesializada sira.

Governu Nova Zelandia prontu apoia Timor-Leste hodi haforss programa nutrisaun no kapasitasuan rekursus humanus iha area espesializadas.

Komitmentu ida ne’e hato’o husi Embaixadora Nova Zelandia ba Timor –Leste, Vicki Poole hafoin hasoru malu ho Ministru Saude Rui Maria de Araujo hodi diskute kona ba posibilidade no oportunidade ne’ebe Nova Zelandia iha ba Timor –Leste.
Embaixadora Vicki Poole, hateten Nova Zelandia disponivel tebes atu apoia Ministerio Saude (MS) hodi redus malnturisaun iha Timor –Leste, liu –liu asegura labarik no inan fo susu sira asesu ba suplementu ne’ebe riku ho valor nutrisaun.
Nia dehan, Nova Zelandia iha produsaun susu been ne’ebe kualidade diak tebes no riku nutrisaun ne’ebe bele ajuda inan fo susu no labarik sira iha Timor –Leste, liu –liu hadia sira nia status nutrisaun tanba labarik sira Nova Zelandia hemu susu been barak.
“Ami seidauk iha akordu ida, maibe governu Timor –Leste mak presiza hanoin didiak oinsa atu lori susu been sira ne’e mai iha Timor –Leste hodi distribui ba iha labarik no inan fo susu sira,” nia hateten hafoin hasoru malu ho Ministru Saude, iha Dili.
Nia dehan, governu Nova Zelandia kontente atu ajuda Timor –Leste iha area ida ne’e liu –liu fornese hahan no suplementu ba labarik sira, maibe depende ba iha governu Timor –Leste.
Kona ba kapasitasaun, nia dehan governu Nova Zelandia sei fasilita kooperasaun entre institute akademiku Timor –Leste no Nova Zelandia, atu estabelese sentru formasaun ba area espesializada saude nian iha Timor –Leste.
Alende ne’e, nia dehan kada tinan governu Nova Zelandia mos oferese hela bolsu estudu ba Timoroan nain 15 hodi hasai estudu iha ne’eba, ba area sira hanesan jestaun negosio, jestaun ospitais no seluk tan.
Nia informa, governu Noza Zelandia durante ne’e fo ona apoia ba governu Timor –Leste iha area edukasaun, agrikultura, seguransa, defeza no direitus humanus.
Entretantu, Ministru Saude Rui Maria de Araujo hateten kooperasaun ho governu Nova Zelandia la’o kleur ona desde tinan 2000, maibe iha area kapasitasaun rekursu humanu deit.
“Ami buka hela dalan atu servisu hamutuk kompania sira iha Nova Zelandia, tanba sira pais ida ne’ebe produs susu been numeru um iha mundu,” nia hateten.
“Sira nia susu been kualidade diak tebes, tanba ne’e Ministerio Saude explora hela posibilidade atu introdus mos komponente susu been liu husi programa apoiu suplementu ba inan isin rua no labarik tinan lima mai kraik,” nia hateten.
Kona ba nesesidade kapasitasaun, nia dehan ministeriu sei haree no analiza nesesidade ida ne’e no diskute ho reprezentante Nova Zelandia iha Timor –Leste kona ba oportunidade sira ba Timor oan.