Fasilidade Saude La Kria Espasu Ba Fuma Nian

Diretor Nasional Saude Publiku, Pedro Canisio hateten Ministeriu da Saude (MdS) sei la kria fatin fuma nian ba iha fumador sira iha fasilidade saude sira iha teritoriu tomak, maske iha lei rejime kontrolu tabaku nian fo dalan.

Razaun, nia dehan tanba iha tinan 2015 Ministeriu da Saude lansa ona zona livre tabaku iha sentru saude hotu iha teritorio tomak inklui ospitais sira, maibe realidade sosiedade (vizitantes, familia pasiente no pasientes) kontinua fuma.
“Ita presiza tan regulamentu ruma atu haforsa liu tan lei ida ne’e,” nia hateten iha Bebora, Dili.
“Husu jestor sira atu kontrola no halo monitorizasaun tanba ita sei la prepara fatin fuma iha fasilidade saude.”
Nia informa, regulamentu ne’ebe presiza mak diploma ministerial ba taxa no presu sigaru nian iha rai laran no kontrolu iha fatin publiku sira.
Nia hateten, regulamentu ida ne’ebe hetan ona aprovasaun mak emblagen tabaku ne’ebe hahu sosializa ba iha kompania importador sira atu halo importasaun sigaru mai Timor –Leste, tenke uza emblagen Timor nian.
Entretantu, Xefe Departamentu Kontrolu Kualidade e Komunikasaun Ospital Nasional Guido Valadares (HNGV), Paulina Pinto hateten ospital nasional tau ona avizu bandu fuma iha koridor ospital nian, maibe ema nafatin fuma, tanba seidauk iha konsiensia no konesementu kona ba impaktu sigaru ba saude.
Nia dehan, servisu ne’ebe sira halo mak fo instrusaun ba iha seguransa sira hodi halo kontrolu iha area ospital nian no fo avizu ba vizitante no familia sira atu labele fuma iha ospital laran.
“Ami fo xamada atensaun deit bainhira haree ema fuma iha area ospital no ami mos fo informasaun ba iha familia no vizitantes atu labele fuma, maibe la fasil atu muda ema nia mentalidade ne’e,” nia hateten.
Nia informa, iha HNGV laiha fatin espesifiku ba fumador sira, tanba ne’e ba sira ne’ebe hakarak fuma tenke sai ba liur, labele iha area ospital nian.
Nia sujere, ba iha ministeriu atu iha regulamentu ida hanesan baze legal ba sira atu pasa revista ba iha visitante sira atu asegura laiha sigaru ne’ebe lori tama ba iha ospital laran.