KNKS-TL Fahe Informasaun Prevensaun HIV Ba Grupo Leziaval

Komisaun Nasional Kombate HIV/SIDA Timor –Leste (KNKS-TL) servisu hamutuk ho Grupo Leziaval desimina informasaun kona ba prevensaun transmisaun Human Immunodeficiency Virus (HIV) no hahalok riskus ba foinsa’e sira ne’ebe hamahon aan iha grupo Leziaval.

Sekretario Ezekutivu KNKS-TL, Daniel Marçal hateten joven barak mak menus konesementu kona ba hahalok risku ne’ebe bele transmite virus ida ne’e.
Nia dehan, joventude mak alvu principal ba iha komisaun hodi halo kampanha edukasuan prevensaun atu hasa’e sira nia konsiensia hodi husik hahalok risku sira hanesan ransu livre, seksu livre no droga.
“Joven barak mak agora ladun fo konsentrasaun ba iha hasa’e kapasidade atu fo kontribuisaun ba iha dezenvolvimentu nasaun ida ne’e tuir sira nia abilidade no talentu ne’ebe iha,” nia hateten iha Xanana Reading Room Largo Lecidere, Dili.
Nia preokupa, ho relasaun domin ne’ebe joven sira hala’o ohin loron tanba joven barak mak konsidera domin tenke iha relasaun seksual maske seidauk kaben.
Nia hateten, HIV oho ona joven balun no agora joven barak mak sei moris terus hela tanba moras ida ne’e.
Nia informa, iha tinan ida ne’e 2017 komisaun gasta ona osan ho montante $200 mil resin hodi halo kampanha sosializasaun prevensaun transmisaun HIV iha teritorio tomak.
Entretantu, Koordenador Grupo Leziaval João Paulo Baptista hateten sira bolu komisaun hodi fahe informasaun kona ba moras HIV/SIDA ba joventude sira ne’ebe hamahon aan iha grupo Leziaval.
“Ita haree mundu ho nia globalizasaun no amizade ne’ebe livre liu, ita tauk virus ida ne’e afeita ba sira, entaun ita bolu komisaun mai hodi fahe mos informasaun importante ba sira atu sira bele iha konesementu,” nia hateten
Nia dehan, informasaun sira ne’e hanesan lisaun ida ba foinsa’e sira ne’e no sira atu prevene aan husi virus ida ne’e no bele habelar tutan ba ema seluk.
Leziaval mak grupo kultural ne’ebe harii iha tinan 1998 hodi sai mahon ba joventude sira kuaze 200 resin hodi aprende kona ba dansa kultural no arte sira seluk.
Nia informa, grupo Leziaval mos promove ona dansa cultural Timor nian ba iha nasaun sira seluk iha mundu.