Segunda, Fevereiro 19, 2018
Total visitors: 196285

Xefe Sentru Saude Vera Cruz, Dulce Tilman hateten komunidades iha ona konesementu ba prevensaun moras sira iha tempu udan, liu –liu moras Diarea no Dengue, maibe asaun pratika sei menus.

Xefe Sentru Saude Vera Cruz, Dulce Tilman konsidera komunidade sira nia asaun hodi prevene moras iha tempu udan sei menus.

Nia dehan, kada tinan iha tempu udan monu rai kazu ne’ebe registu maka’as iha fasilidade saude sira mak Diarea no Dengue, tanba impaktu husi ambiente ne’ebe la saudavel.
“Husu ba komunidade sira iha tempu udan hanesan ne’e tenke nono bee tasak didiak atu hemu, hahan sira taka metin atu lalar labele hobur no fase liman ho sabun bainhira atu han hodi bele prevene moras diarea,” nia hateten iha servisu fatin Vera Cruz, Dili.
Nia hateten, bainhira tempu udan 50% pasiente ne’ebe sira registu lor-loron ho kazu diarea, maioria labarik no adulto idade tinan 15 ba leten.
Nia dehan, tratamentu ba moras diarea mak ba sira ne’ebe la todan simu aimoruk no konsola husi pesoal saude sira atu hemu no halo tuir iha uma, maibe sira ne’ebe todan tenke baixa hodi hetan tratamentu intensive.
Entertantu, Xefe Suku Comoro Eurico da Costa de Jesus rekonese lixu sai problema bo’ot ne’ebe seidauk rezolve, tanba komunidade sira la iha konsiensia atu kontribui.
Nia dehan, iha tempu udan monu rai kuantidade lixu aumenta maka’as, tanba lixu domestiku ne’ebe komunidade soe, bee lori naklekar arbiru halo dodok, lalar ba hobur lori fali moras ba iha komunidade.
“Importante mak kontinua habelar informasaun sira ba komunidade oinsa atu prevene moras sira ne’ebe afeita ba ita nia saude hanesan diarea, dengue, ISPA no seluk tan,” nia hateten
Nia hateten, lei numeru 33/2009 kona ba saneamentu iha ona atu fo sansaun ba iha individu no grupo ne’ebe soe lixu arbiru, maibe seidauk implementa.
Alende ne’e, governu mos hasai ona orario atu so’e lixu domestiku sira hanesan tuku 4 madrugada to’o tuku 7, maibe komunidade nafatin viola.
Portantu, dadus servisu Vigilansia Epidemologia Ministerio da Saude registu kazu diarea hamutuk 1291 durante fulan Novembru to’o Dezembru 2017. Husi kazu ne’e iha nain rua mak mate.

E-mail Subscription

Enter your email address:

    Poll

    Nothing found!

    Follow us on Twitter