Saude Dili Identifika Kazu Dengue 15

Iha fulan Janeiru, hahu loron (1-19) Saude Munisipiu Dili registu ona kazu dengue hamutuk ema nain 15, maioria labarik.

Diretora Saude Munisipio Dili, Agustinha Seguerado hateten pasiente sira ne’e halo hela tratamentu iha fasilidade saude no halo ona intervensaun direita liu –liu fomigasaun ba pasiente sira nia hela fatin (bairo).
Alende fomigasaun no fahe aimoruk abate, nia dehan sira mos nafatin fo edukasaun saude ba komunidade sira atu hola responsabilidade hodi kontribui ba iha prevensaun moras ida ne’e.
“Difikuldade ne’ebe ita hasoru, mak numeru kontaku ne’ebe husi diresaun fo ba ekipa saude Dili kontaktu ba hodi husu diresaun lolos, maibe telephone mate entaun atraza intervensaun,” nia hateten iha servisu fatin Bairo dos Grilhos, Dili.
Nia dehan, husi kazu ne’ebe registu barak liu mai husi postu administrative Dom Aleixo no iha kazu ida-rua iha postu administrative Veira Cruz, Becora no Nain Feto.
Alende moras dengue, nia dehan moras diarea mos kontinua registu maka’as iha fasilidade saude sira iha munisipio Dili.
Entretantu, Xefe Sentru Saude Vera Cruz Dulce Tilman hateten sira registu duni kazu dengue, maibe ida ka rua deit, barak liu identifika husi klinika maternidade Fatumeta.
“Ami iha ekipa ne’ebe preparadu atu halo atendimentu bainhira mosu kazu surtu sira hanesan diarea no dengue,” nia hateten.
Nia hatutan, sira iha rekursu no aimoruk ne’ebe sufsiente atu fo atendimentu ba iha pasiente sira ne’ebe mai ho kazu diarea no dengue inklui mos moras seluk.