Quarta, Fevereiro 21, 2018
Total visitors: 196559

Labarik ho idade ki’ik pursentu 4 (4%) husi total pasiente 101 resin ne’ebe identifikadu positive sofre moras Lepra, tuir dadus husi Ministerio da Saude tinan 2017 nian.

Husi total pasientes 101 resin ne’ebe identifikadu positive moras lepra, pursentu hat (4%) labarik.

Diretora Jeral Prestasaun Servisu iha Ministerio da Saude (MdS), Odete Veigas hateten Timor –Leste konsege elimina moras ida ne’e iha tinan 2011, maibe moras ida ne’e komesa aumenta maka’as, tanba iha munisipio balun ne’ebe moras ida ne’e sei eziste.
Nia dehan, munisipio sira ne’ebe sei eziste mak hanesan munisipio Dili, Baucau, Manatuto, Covalima, Bobonaro, Ermera no Regiaun Administrativu Espesial Oe-Cusse -Ambeno (RAEOA).
Nia rekonese, katak servisu promosaun saude no deteksaun kazu durante ne’e seidauk maximu tanba kazu aumenta sa’e.
“Moras ida ne’e afeita mos ba labarik sira ita iha 4%, tanba moras ne’e relasiona ho sistema imunidade ema nian, entaun labarik sira fasil hetan moras ida ne’e bainhira membru familia ida hetan moras ida ne’e,” nia hateten iha Hotel Timor, Dili.
Nia dehan, esforsu ne’ebe ministerio halo mak integra programa hotu iha vizita saude na familia ne’ebe sei implementa segundu faze iha fulan Marsu tinan 2018, hodi bele detekta ema barak liu tan atu bele halo tratamentu hodi prevene transmisaun ba ema seluk no disabilidade.
Nia hateten, moras Lepra ne’e fasil atu kura no kombate, maibe importante ema hotu tenke servisu maka’as atu halo deteksaun kazu sedu halo tratamentu hodi oho microbios ne’ebe iha.
“Ita bele kura moras sira ne’e, maibe ema nia moris ho situasaun ekonomia ne’ebe la favorese no ambiente la moos atu moris diak, bele kontribui ba iha moras ne’e afeita ba ema nia fisiku no mental,” nia hateten.
Portantu dadus husi tinan 2012-2017 identifika ona kazu Lepra hamutuk 600 resin ne’ebe balun ho kondisaun defisente, tanba tarde halo tratamentu, maibe iha barak mak agora dadaun halo hela tratamentu.
Entretantu, Espesialista Kulit doutora Terlinda Barros hateten lepra ne’e moras infeksaun kulit ne’ebe kauza husi microbakterium Leprae (kutun) ne’ebe moris iha ema nia nervus, kulit, saraf (uat) tanba ne’e bainhira la halo tratamentu sedu bele halo ema defisensia.
Nia dehan, tempu inkubasaun ba moras ida ne’e kleur, katak ema ne’ebe iha ona bacteria ida ne’e sei la hatudu sinais iha tempu badak, maibe bele tinan 5 to’o 10 mak bele mosu sinais.
Nia hateten, sinais ba moras Lepra mak hanesan hena mutin iha isin ne’ebe la katar, la moras, mosu kafuak mean iha tilun, liman siku tenke lori lalais ba iha fasilidade saude hodi halo teste laboratorium atu justifika.
“Bainhira iha sinais Lepra, lalika tauk ita halo testu kompleta laboratorium, se positive ita halo tratamentu, hemu aimoruk fulan primeiru hamenus ona risku da’et ba ema seluk no hamenus ona risku disabilidade,” nia hateten
Nia dehan, tratamentu ba Lepra iha oin rua : bele hemu aimoruk Multi Drug Therapy (MDT) ba fulan neen no ida seluk bele tinan ida, depende ba iha gravidade.
Nia informa, konesementu komunidade nian ba moras ida ne’e sei minimu tebes tanba ne’e edukasaun promosaun ne’e importante tebes.
Iha parte seluk, Reprezentante Organizasaun Mundial Saude (OMS), Doutor Rajesh Pandav sujere ba ministerio no parseiru sira atu fo prioridade ba iha munisipio afeitado sira hodi halo intervensaun.
Nia dehan, labarik sira mak jerasaun foun ba futuru Timor –Leste nian, importante atu prevene sira husi disabilidade kauza husi moras lepra liu husi halo deteksaun sedu no tratamentu.
“Iha loron mundial Lepra tinan ne’e, ami bolu atensaun ba iha inisiativa ne’ebe forte hodi bele realiza zero disabilidade ne’ebe relasiona ho moras lepra ba labarik feto no mane sira, tanba sira mak jerasaun foun ba nasaun no kontinua avansa ba mundu ne’ebe livre husi Lepra,” nia hateten
Nia hateten, kazu lepra ba labarik bele redus liu husi fo prioridade atu halo intervensaun ba iha familia, vizinho ne’ebe hetan moras tanba labarik sira hetan moras ida ne’e iha uma laran.

  • Qua
    Fev
    21
    2018
    MdS-Parseirus Realiza Kampanha Nasional Saude Maternu Infantil no Nutrisaun
    Ministerio da Saude ho parseiru sira sei hala’o kampanha nasional kona ba saude maternu infantile no nutrisaun nian durante tinan tomak, hodi hasa’e konesementu no konsiensia komunidade sira nian atu ...
  • Qua
    Fev
    21
    2018
    Pasientes Matan 117 Halo Operasaun Ba Matan
    Iha fulan Janeiru nia laran, Sentru Nasional Matan halo ona operasaun matan ba ema nain 117, maioria katarak no problema matan sira seluk. Pasiente matan hamutuk 117 mak konsege halo operasaun ba m...
  • Qua
    Fev
    21
    2018
    Merenda Eskolar La La’o Tanba Laiha Orsamento
    Desde tama tinan foun 2018, Janeiru to’o agora programa merenda eskolar seidauk la’o iha eskola sira tanba laiha orsamentu. Diretor Belchior Maria Barros hateten programa merenda eskolar to’o agora...
  • Qua
    Fev
    21
    2018
    Asidente Trafiku Iha Fulan Janeiro Hamutuk 146
    Diretor Tranzito Nasional, Inspektor Xefe Polisia Antonio Soares hateten total asidente trafiku ne’ebe mak akontese iha munisipiu sira inklui Dili durante fulan Janeiro hamutuk 146 kazus. Total asi...
  • Qua
    Fev
    21
    2018
    PNTL Prende Motor 43 Iha Valentine’s Day
    Iha loron domin nian (valentine’s day) 14 Fevereiru, Polisia Tranzito Munisipiu Dili prende motorizadas hamutuk 43 tanba motorista sira viola regras tranzito nian ne’ebe iha. Polisia Tranzito husi ...

E-mail Subscription

Enter your email address:

    Poll

    Nothing found!

    Follow us on Twitter