Sexta, Março 29, 2024
Total visitors: 766366

Ministerio da Saude dezenvolve hela draft estruturas organika no regras funsionamentu sentru saude foun nudar baze legal ida, atu organiza servisu diak liu tan hodi fo prestasaun servisu kuidadu saude primario ba povu.

Ministeriu da Saude kria estruturas no regras foun ba funsionamentu sentru saude hodi organiza servisu ne’ebe diak liu tan.

Ministru Saude, Rui Maria de Araujo hateten nesesario duni atu iha estruturas no regras funsionamentu foun ba sentru saude sira, tanba estrutura ne’ebe iha tinan 10 liu ona no iha melhoramentu ba setor saude.
Nia dehan, estruturas sentru saude komunitaria sei iha seksaun hat mak hanesan seksaun koordenasaun da administrasaun jeral, responsabiliza ba servisu administrasaun finansas, rekursus humanus no material, seksaun koordenasaun tekniku no programas responsabiliza servisu kontrolu moras, saude publika no apoiu diagnostiku terapeutiku, seksaun koordenasaun saude na familia responsabiliza servisu konsulta jeral, servisu interamento do servisu saude komunidade no seksaun postu de saude.
Nia rekonese, sentru saude sira hasoru dezafiu lubuk, maibe nia enkoraja xefe sentru saude sira ho saude munisipio sira organiza aan servsiu hamutuk ho autoridade local sira hodi buka solusaun ba iha problema saude ne’ebe iha.
“Tempu ona ita atu halo revizaun, atu haree hikas estruktura no regras funsionamentu servisu saude nian no deskonsentrasaun administrative ne’ebe hahu ona iha tinan 2016, tanba atu jere sentru saude entrega ona ba iha munisipio no postu administrative sira,” nia hateten bainhira halo konsultasaun ho xefe sentru saude sira iha salaun CHC Laclubar, Manatuto.
Nia hateten, iha knar lubuk ida ne’ebe jere iha sentru saude entrega ona ba iha munisipio no postu administrative, maibe funsionamentu nafatin tutela ba Ministerio da Saude.
Nia dehan, Ministerio da Saude sei halo aprezentasaun husi rezultado konsultasaun ne’e ba iha Ministerio Administrasaun Estatal (MAE) no sei hasai diploma ministerial ida atu formaliza hanesan baze legal ida, atu oreinta servisu sentru saude no saude munisipio sira diak liu tan hodi presta servisu kuidadu saude primaria ba povu sira ho diak.
Entretantu, Xefe Sentru Saude Laclubar Manuel Soares Quintão konkorda ho estruturas no regras funsionamentu foun ne’e, maibe tenke aumenta rekursu humanus mos.
Nia dehan, servisu hirak ne’e durante ne’e la’o hela iha sentru saude sira, maibe la maximu tanba menus rekursu humanus.
“Tenke aumenta rekursu humanu, tanba iha seksaun barak e kada seksaun tenke la’o ho nia ekipa, lalika kahur tun-sa’e, tanba durante ne’e ema ida kaer programa rua ou tolu,” nia hateten.
Iha sorin seluk, Xefe Sentru Saude Soibada Simplicio de Jesus Alves hateten la presiza aumenta rekursu humanus, maibe importante hasa’e kapasidade no kuinesementu pesoal sira nian ba iha programa espesifiku sira.
“La presiza aumenta rekursu humanu, maibe importante iha mekanismu ida atu hasa’e sira nia konesementu, nune’e bainhira sira hetan responsabilidade ida ne’e sira iha ona konesementu atu jere servisu sira ne’e,” nia hateten
Nia preokupa, ho atendimentu saude oral no matan nian ne’ebe sei konsentra deit iha nasional. Durante ne’e atendimentu ne’ebe sira fo mak aimoruk deit, ba pasiente ne’ebe presiza oklu no operasaun tenke halo referral ba iha Dili, nune’e mos saude oral nian.