Sentru Saude Laclubar Seidauk Utiliza Sistema Elektronika

Sentru da Saude Laclubar seidauk utiliza sistema registu elektronika hodi halo konsulta ba pasiente sira durante ne’e, tanba seidauk hetan orientasaun husi saude Munisipio Manatuto.

Xefe Sentru Saude Laclubar, Manuel Soares Quintão hateten mediku sira hetan ona fasilidade (tablet), maibe seidauk utiliza atu halo registu ba iha pasiente sira ne’ebe mai konsulta, tanba seidauk hetan orientasaun husi munisipio.
“Ami seidauk implementa, ami sei la’o hela ho manual, ami hein hela orientasaun husi munisipio,” nia hateten iha servisu fatin Laclubar, Manatuto.
Nia hateten, moras ne’ebe registu maka’as iha tinan kotuk mak moras Infeksaun respiratoriu alto (ISPA), Diarea, moras kulit no moras seluk ne’ebe kauza principal husi higiene no ambiente.
Entretantu, Xefe Sentru Saude Soibada Simplicio de Jesus Alves hateten sira implementa ona sistema registu elektronika ba konsulta jeral, maibe seidauk kompletu tanba sentru saude balun susar asesu ba iha rede telekomunikasaun.
“Ita atu halo relatorio digital ne’e presiza mos asesu ba iha rede telekomunikasaun, maibe iha postu saude Buarahun Manufahi ki’ik la asesu ba rede,” nia hateten.
Iha fulan Agustu tinan kotuk (2017), eis Primeiru Ministru atual Ministru Saude Rui Maria de Araujo lansa ona sistema elektronika ne’ebe deklara katak fasilidade saude hotu utilize sistema registu elektronika hodi halo konsulta ba pasiente sira.
Hatan ba kestaun ne’e, Ministru Saude Rui Maria de Araujo hateten sei koalia ho kompania telekomunikasaun sira hodi bele fornese rede ba iha fasilidade saude sira hotu.
Iha fatin hanesan, ministru mos entrega desktop ida ho marka Lenovo ba iha Sentru Saude Laclubar no tau mos rede internet (wifi) hodi fasilita servisu registu elektronika.