Falta Rekursu Umanu, Empede Implementa PESS 2013-1230

Planu Estratejiku Seitor Saude (PESS) ne’ebe sei estabelese Postu Saude ba kada sukus kompleta ho fasilidade saude inklui mediku sira iha 2013-1230, seidauk bele implementa tanba falta de rekursu umanu.

“Hau hanoin planu Ministeriu Saúde nian atu estabelese postu saúde iha sukus, importante tebes atu rezolve uluk problema rekursu umanu tanba iha ami nia Sentru Saúde Sub-distritu Uatocarbau parteira nain rua deit difisil atu fo asistensia ba inan isin rua sira no ajuda halo partus,” dehan Komunidade Uatocarbau, Agostinha da Costa, iha Uatocarbau, Distritu Viqueque.
Iha parte seluk Diretor Nasional Rekursu Humanu Ministeriu Saúde, Duarte Ximenes hateten miniteriu iha obrigasaun atu forma rekursu umanu e importante tebes antes implementa PESS ne’e.

“Ita tenke forma hela deit pesoal sira ne’e kada tinan iha rai laran no liur, tanba ita iha hanoin ba futuru kada suku ida tau parteira nain rua, e ita nia parteira agora dadaun iha atus lima resin maibe ita iha sukus 442, entaun numeru ida ne’e seidauk bele responde ba planu estrategiku,” dehan Diretor Ximenes.

Miniteriu mos iha obrigasaun atu halo alokasaun parteira sira ba iha Ospital Referral (OR) lima (5), Ospital Nasional, 65 Sentru Saúde no Postu Saude sira ne’ebe estabelese ona iha sukus balun ne’ebe durante ne’e fo ona asistensia ba inan isin rua sira.

Alende ne’e ministeriu mos fo apoiu kareta multifunsaun ba Sentru Saúde sira atu bele fasilita servisu ne’ebe iha, no bele evakua moras ne’ebe presiza hala’o tratamentu emergensia iha OR no Nasional.