Makina Fase Ran La To’o, Pasiente Ho Infeksaun Halo Tratamentu Iha Liur

Provizoriumente Ospital Nasional Guido Valadares (HNGV) halo transferensia pasiente ho moras infeksaun ba halo tratamentu iha rai liur, tanba makina fase ran nian hat (4 unit) ne’ebe iha la sufsiente.
“Provizoriomente sira ne’ebe ho moras infeksaun hanesan Hepatitis no HIV/SIDA ne’ebe presiza fase ran, ami sei halo transferensia ba fase iha rai liur nune’e labele fo impaktu ba makina no ema nia vida, tanba ita iha makina hat deit nune’e mos ita atu halo tratamentu ba pasiente ida (fase ran) ho komplikasaun moras infeksaun ruma ne’e tenke iha kuartu no makina khusus ba sira, entaun ita presiza estabelese ida ne’e,” dehan Administrador HNGV, Rui Gago Exposto Manuel, (30/07), iha Bidau Toko Baru, Dili.

Governu liu husi Ministeriu Saude (MS) iha ona planu atu sosa tan makina fase ran nian hat (4) nune’e kompleta walu (8) iha 2013, nune’e bele fo tratamentu ne’ebe diak ba pasiente sira inklui mos sira ne’ebe ho moras infeksaun.

Makina fase ran nian hat ne’ebe agora dadaun iha HNGV, rua apoiu husi Governu Korea no governu sosa rua ho montante orsamentu hamutuk US$ 120.000.
Enkuantu total pasiente iha fulan Junu ne’ebe halo fase ran ho moras rins hamutuk nain sia (9) e sira sei fase sira nia ran tuir orariu ne’ebe iha.

Iha parte seluk Deputada Ilda Maria da Conçeicão, katak Ministerio Saúde tenke iha politika transferensia moras ba liur ne’ebe klaru, nune’e sira ne’ebe la presiza ba halo tratamentu iha liur ne’e labele ba maibe tuir tratamentu iha rai laran deit tanba iha HNGV mos iha ona makina fase ran no seluk tan.

“Hau hanoin makina hat ne’e atu sufsiente ka la’e ne’e depende ba numeru moras ne’ebe iha importante tebes ministerio saúde halo levantamentu ba moras sira ne’e nune’e ita mos bele hatene fasilidade ne’ebe ita iha ne’e sufsente ona ka sei presiza tan hodi bele fasilita pasiente sira labele demora liu,” dehan Deputada Ilda.