Problema Makina CT-Scan iha HNGV Sei Rezolve Iha Tempu Badak

Makina Computed Tomography Scan (CT-Scan) iha Ospital Nasional Guido Valadares (HNGV) ne’ebe hetan avaria desde 2010, sei halo manutensaun iha tempu badak.

“Iha dia 28 foin lalais ne’e teknika ida mai husi Korea identifika ona problema iha makina ne’e no nia rasik lori ona problema ne’e ba iha Korea iha pertengahan fulan Agostu sira mai hamutuk ho ekipa ida atu halo

manutensaun ba makina ne’e no fo mos treinamentu ba ita nia ema iha Ospital Nasional Guido Valadares, oinsa atu halo operasaun ba makina no manutensaun ba makina ne’e,” hateten Administrador HNGV, Rui Gago Exposto Manuel, (30/07), iha nia knar fatin Bidau Toko Baru, Dili.

Tuir nia, durante ne’e pasiente  ne’ebe hakarak hasai raisis ba sira nia moras,liu-liu sira ne’ebe emerjensia los hanesan problema ho kakutak, ospital halo transferensia ba liur.

Iha parte seluk Deputada Ilda Maria da Conçeicão dehan,  problema ne’e akontese tanba governu la tau osan ba rekursu umanu, tanba Timor rasik seidauk iha tekniku ida atu halo manutensaun ba makina ne’e.

“Ita hakarak atu utilize makina ne’ebe ita laiha espesialista ida (teknika) ba makina ne’e entaun nia konsekuensia mak nune’e makina sai faila, tanba ne’e bainhira ita tau ona osan atu sosa makina, tau mos osan hodi kontratu ema espesialista ba makina ne’e husi nasaun seluk,” Deputada ne’e kestiona.