Aimoruk Laiha, Klinika Nehan Iha SSC Taka

Klinika Nehan iha Sentru Saude Comoro (SSC) ne’ebe durante ne’e fo konsulta ba pasiente nehan, agora dadaun taka tanba aimoruk laiha.

Klinika Nehan ne’e taka tanba impaktu husi asaun greve ne’ebe funsionario sira iha Servisu Autonomo Medikamentus no Ekipamentus de Saude (SAMES) halo, hodi difikulta distribuisaun aimoruk iha klinika ne’e.

“Klinika nehan agora taka no la fo atendimentu ba pasiente sira tanba aimoruk laiha, loron seluk mak mai tenta fali to’ok tanba diretor sira ohin ba tuir enkontru ida iha laran kona ba problema aimoruk karik,” hateten Pesoal Saúde iha klinika ne’e ne’ebe lakohi publika nia identidade, (07/08), iha Sentru Saúde Comoro, Dili.
Iha Klinika ne’e rasik iha deit Pesoal Saude nain rua mak fo atendimentu ba paseinte nehan durante ne’e.

Iha parte seluk Membru Parlamentu Nasional, Deputada Josefa Alvares Soares katak nudar funsionariu iha direitu atu halo greve hodi hetan sira nia direitu maibe hanesan profesionalismu saúde ne’ebe nia serivisu direitamentu ho ema nia vida moris.

“Hau hanoin greve hodi hatudu protest ne’e sira iha maibe labele halo naruk demais tanba ema seluk mos iha direitu atu hetan asistensia saúde,” dehan Deputada Soares.

Tuir Observasaun Jornalista iha SSC nota katak pasiente sofre nehan nain hat ne’ebe ba vizita klinika nehan SSC atu konsulta sira nia nehan to’o iha ne’eba sira hare Avizo ida taka iha odamatan “Klinika la halo kunsulta ba nehan tanba aimoruk laiha obrigado” e pasiente sira ne’e sente triste no hirus tanba la’o kolen to’o iha klinika maibe la konsege konsulta sira nia nehan.