Eis Vise-Ministra Saude Hanjam: Sei Loke Pratika Paliativus No Mal Nutrisaun

Kargu Politika bele troka bainhira partidu seluk mak manan, maibe profisaun labele husik hanesan Vise Ministra Saude (VMS), Madalena Hanjam hafoin katik husi kargu Vise ministra iha IV Governu Konstitusional, nudar ema professional iha area saude nia sei loke klinika iha uma hodi fo asistensia ba komunidade sira.
“Hanesan ema profesional hau nia servisu iha, e iha tempu badak hau sei loke pratika tratamentu paliativus no mal nutrisaun, ne’e mak hau sei halo, ida seluk iha liur hau sei hare oinsa atu kontrola tabaco buat tolu ne’e mak sai hanesan hau nia pratika klinika iha uma,” dehan eis VMS, Doutora Hanjam (08/08) bainhira partisipa iha serimonia tomada de pose ba Membru V Governu, iha Palasiu Nobre Lahane, Dili.

Tuir nia, durante ne’e Ministeriu Saude rasik seidauk iha programa ida kona ba pratika paliativus no kazu mal nutrisaun kontinua aas iha rai laran.
Alende loke pratika klinika iha uma, nudar professional saude nia sei halo advokasia ba ministeriu relevante hodi hare problema sira ne’e, liu-liu kona ba pratika paliativus tanba ema barak mak hetan moras ne’e durante ne’e.

“Durante ne’e moras barak mak halo tranferensia ba liur maibe labele kura hanesan Kanker haruka fila ba uma, ho ida ne’e hamosu inisiativa husi mediku atu estabelese klinika ida nune’e bele fo atendimentu ne’ebe diak ba kazu ida ne’e,” Doutora Hanjam tenik.
Doutora Hanjam dehan, oras ne’e dadaun iha 58% labarik ho idade tinan lima mai kraik ho kazu mal nutrisaun inklui inan isin rua iha pursentu 43.

Sei halo advokasia no koalia ho ministeriu relevante sira hanesan Ministeriu Justisa (MJ) atu hare kona ba legislasaun ba tabaco nian, Ministeriu Edukasaun (ME) hasa’e sensivilidade komunidade, Ministeriu Komersiu Industria (MKIA) hare kona ba presu sigaru ne’ebe produs iha Timor inklui mos politika MS nian tanba konsumu tabaco bele habadak ema nia vida.

“Hau rekomenda ba ministru saúde foun tenke halo sustentabilidade ba sistema ne’ebe hadia ona, mantein ho ida ne’e no dezenvolve nafatin ba oin,” Doutora Hanjam rekomenda. 
Iha lidun seluk Komunidade Cesalthina Angela, sente kontente tebes ho inisiativa ne’ebe profesionalismu saúde sira iha atu bele tulun labarik sira ne’ebe ho kondisaun malnutrisaun tanba labarik mak futuru ba nasaun ida ne’e nian.

“Ita hein katak ninia hanoin positive ne’ebe diak no kreatividade diak bele tulun labarik Timor oan sira tanba sira mos hatene problema malnutrisaun ne’ebe akontese iha rai laran no sira bele sujere ba governu foun ne’ebe iha atu bele halao tanba sira nia responsabilidade atu halao,” dehan Komunidade Angela, (09/08) iha Farol, Dili.