Ministerio Saude Sei Halo Levantamentu Rapidu Hodi Identifika Problema Prioridade

Atu bele hatene problema ne’ebe durante ne’e setor saude infrenta no presiza hadiak liu tan, Ministeriu Saude sei halo levantamentu rapidu hodi identifika problema prioridade ne’ebe sei hadia iha tinan lima mai ne’e.

“Hau hanoin prioridade mak sei halo levantamentu rapido atu identifika saida mak ita halo ona iha tinan lima no problema saida mak ita sei halo iha areas hotu –hotu hanesan prestasaun servisu, jestaun, administrasaun depois ita hanoin atu rezolve no tau iha eskala prioridade,” hateten Ministru Saúde, Sergio Gama da Costa Lobo, foin lalais iha Dili. 
Kona ba hatun numeru mortalidade inan ho oan iha teritoriu tomak, ministeriu sei hala’o programa liu-liu haforsa programa SISKA ne’ebe IV Governu Konstitusional estabelese ona hanesan aloka Pesoal Saúde sira iha area rurais, Postu Saúde hodi fo asistensia saúde ba komunidade sira,

Ministeriu mos sei tau osan hodi moderniza ekipamentus medikus sira no fasilidade saúde sira hanesan ambulansia no seluk tan inklui mos orsamentu ba manutensaun ekipamentus no fasilidade sira.
Ministru Lobo dehan, iha mandatu tinan lima liu ba MS halo ona progresu barak inklui prevensaun ba moras sira ne’ebe agora numeru sei aas hanesan HIV/SIDA, TBC, Diarea, no seluk tan, e sei kontinua halo sensibilizasaun ba komunidade kona ba moras sira ne’e.

Iha parte seluk Inspektor Jeral Ministeriu Saúde, Antonio Caleres Junior, en nome Funsiunariu MS hotu prontu atu kolabora ho Ministru Saúde foun hodi dezenvolve setor saúde durante tinan lima mai.
“Los duni servidor saúde sira hotu ho laran ksolok simu ita bo’ot sira atu simu ita bo’ot sira nia instrusaun, orden hodi bele hala’o prestasaun ne’ebe diak liu ba povu Timor-Leste tomak ne’ebe merese simu asistensia saúde,” dehan Inspektor Jeral Junior.