- Publika iha: 15 Agosto 2023
Vise Ministru Operasionalizasaun Hospitais, Flávio Brandão hateten Australian Centre for the Prevention of Cervical Cancer (ACPCC) hato’o sira nia komitmentu hakarak servisu hamutuk ho governu atu kombate moras kankru serviks ne’ebé afeta inan no feto foinsa’e sira iha Timor-Leste.
Nia dehan sira nia servisu foku liu ba halo prevensaun, deteksaun sedu no tratamentu inklui kuidadu paleativus ba moras kankru sira.
“Hanesan governu ita fo benvindu, oinsa mak ita bele kolabora diak no servisu diak iha oin. Hau fiar katak kombate kankru ita presiza elementus hotu-hotu servisu iha nivel hotu-hotu, entau ba oin ita fo atensaun oinsa halo prevensaun diak liu tan, halo deteksaun sedu duke ita ba to’o faze ne’ebé komplikadu,” nia hateten hafoin halo enkontru ho ekipa ACPCC iha Palasio da Sinzas Kaikoli, Dili.
Nia espera grupo konsorsio ACPCC ne’ebé baze iha Sydney, Australia ne’e bele kolabora no partial esperensia servisu sira ho governu halo servisu diak liu tan ba prestasaun kuidadu oncologia nian, liu-liu kankru serviks.
Iha parte seluk, Director, The Daffodill Centre, Professor Karen Canfell hateten sira mai hare direita no aprende situasaun iha rai laran hodi bele apoia governu elemina no kombate moras kankru serviks.
“Ami nia foku liu ba area konaba eleminasaun kankru serviks nian, entau ami nia misaun mai para hare no aprende tanba iha tratamentu kankru ne’e iha pilar tolu. Primeiru oinsa atu fo vasina ba populasaun joven sira, ita nia alin feto sira husi idade 9 até 14, halo screening ba inan sira ho idade 30 ba leten, kuandu iha kazu ne’ebé identifikadu buka maneira ba tratamentu,” nia hateten.
Nia hateten depois fila ba Australia, sira bele mobiliza rekursu hamutuk mai fali apoia servisu ida ne’e.