- Publika iha: 18 Outubro 2023
Iha ámbitu selebrasaun loron mundial seguransa pasiente, Ministériu Saúde no Hospital Nacional Guido Valadares (HNGV) ho Organizasaun Mundial Saúde (OMS) realiza kampaña hodi hasa’e konsiénsia no enkoraja profesionál saúde sira promove enkuadramentu seguransa pasiente iha servisu lorloron atu garantia pasiente sente seguru no hetan atendimentu saúde ho kualidade aas.
Nia dehan profisionál saúde ida-ida tantu servisu iha ospitál nasionál to’o postu tratamentu sira tenke konsente no iha motivasaun aas fó importánsia ba seguransa pasiente, liu-liu la’o tuir enkuadramentu seguransa pasiente nian.
“Mai ita hotu prontu nafatin atu oferese kuidadu saúde ba ita-nia populasaun tomak bainhira sira presiza. Klaru governu nafatin hamriik iha ita-nia sorin atu oinsa kapasita ita-nia fasilidade hotu-hotu atu iha protidaun nafatin, nune’e bele atende ita-nia populasaun,” nia hateten hafoin partisipa iha atividade walk the talk ba kampaña promove seguransa pasiente iha sentru saúde internamentu Vera Cruz, Díli.
Nia hateten indikadór importante ida ne’ebé governu hein hela husi setór saúde mak seguransa pasiente sira-nian.
Entretantu, Komunidade Carlito da Costa hateten lei garante asisténsia saúde ida ne’ebé seguru, gratuita ba sidadaun sira, entaun governu tenke investe hodi hasa’e protidaun fasilidade saúde sira-nian atu pesoal saúde sira hotu bele fornese atendimentu saúde ne’ebé kualidade aas ba povu.
“Ita apresia ho pesoal saúde sira ne’ebé iha atendimentu di’ak ona, maibé la natoon de’it iha ne’e. Presiza atu mellora intermus kapasitasaun kona-ba oinsa mekanizmu komunikasaun ida ne’ebé efetivu, étika komunikasaun ida ne’ebé di’ak atu iha aprosimasaun presuasiva ho pasiente no família sira atu sira labele iha presaun,” nia hateten
Iha oportunidade ne’e, nia eziji governu da-sia atu rezolve lalais problema medikamentu iha rai laran, tanba governu promete ona iha 120 dias nia laran sei rezolve, maibé to’o agora seidauk família sira sei kontinua ba sosa reajente sira hodi hasai ran.
Iha parte seluk Reprezentante Organizasaun Mundial Saúde (OMS), iha Timor-Leste, Dr. Arvind Mathur hateten sira iha servisu koordenasaun ho parseru dezenvolvimentu sira seluk hodi apoia Ministériu Saúde atu eleva kualidade atendimentu, tanba seguransa pasiente parte integradu ida husi esforsu hasa’e kualidade servisu saúde.
Nia dehan alende fó formasaun ba profisionál saúde sira, sira mós servisu iha jestaun lixu médiku nian no asegura implementasaun prevensaun no kontrolu infesaun iha fasilidade saúde sira.
“Ha’u kontente governu da–sia liuhusi Ministériu Saúde fó prioridade ba hasa’e kualidade atendimentu no seguransa pasiente, ne’e refleta ba sira-nia komitmentu atu iha enkuadramentu seguransa pasiente nian no enkuadramentu kualidade servisu saúde ne’ebé di’ak, liu-liu ezisténsia pontu vokal kontrolu kualidade iha ospitál nasionál no ospitál referal sira, tanba pesoal sira-ne’e mak sei asegura seguransa liu-liu haree medida prevensaun no kontrolu infesaun sira, implementasaun matadalan tratamentu sira,” nia hateten.