MS sei oferese parteira no enfermeirus iha ospital Ainaro

Relasiona ho Ospital Ainaro ne’ebe oras ne’e menus rekursu humanu, liu-liu parteira no enfermeirus, Ministeriu Saude (MS) iha ona planu atu oferese parteira no enfermeirus ba iha ospital refere.

“Sim, ami iha ona politika atu haruka parteiras no enfermeirus balun ba iha ne’eba,maibe problema mak hela fatin ba sira ne’e, tanba dalaruma ita nia parteira ba servisu iha fatin do’ok, sira presiza hela fatin ne’ebe seguru ba sira,”hateten Diretor Nasional Rekursu Umanu MS,Duarte Ximenes, semana kotuk iha Kaikoli,Dili.

Tuir nia, iha future MS sei monta parteira no enfermeirus sira tuir ida-idak nia distritu nune’e bele responde nesesidade komunidade sira bainhira halo tratamentu saude.

“Agora ita iha eskola parteira, bainhira sira ne’e remata sira nia estudu,ami monta sira iha sira nia distritu ida-idak,”nia dehan.

Nia hatutan, total Sentru Saude iha Timor-leste hamutuk iha 65, Postu Saude iha 113 enkuantu Ospital Referal iha 6, maibe fatin hirak ne’e sei infrenta menus rekursu umanu, liu-liu iha ospital Ainaro iha deit parteira nain 4 mak atende komunidade sira iha area ne’eba.

Nia afirma, problema menus parteira, laos deit iha ospital Ainaro maibe mos iha postu saude tolu mak laiha parteira e balun iha enfermeirus maibe la iha parteira. “Ezemplu hanesan iha Postu Saude Mausiga iha enfermeiru maibe laiha parteira enkuantu Postu Saude iha Hatu-Beliku iha parteira nain rua deit ba fo atendementu ba populasaun mais u menus 3.727 e hau fiar katak iha future it abele resolve kestaun ne’e,”nia esperansa.

Entretantu Xefe Departamentu Farmasia MS, Antonio Ximenes hateten,wainhira alunus husi distritu ida-idak ne’ebe agora dadauk hala’o estudu hanesan parteira iha UNTL,ICS liu-liu parte Siencias da Saude kuandu formadu hotu, sei aloka nain rua ka tolu ba ospital ne’ebe laiha parteira.

“La’s deit iha Ospital Ainaro maibe iha distritu hotu, bainhira sira ne’e remata sira nia estudu maka ami sei aloka sira iha ida-idak nia distritu nune’e hafasil sira kona-ba hela fatin inklui Ainaro oan sira ne’be estudu iha UNTL,”nia hateten.