- Publika iha: 15 Março 2012
Tuir membru Grupu Feto Parlamentar Timor-Leste (GMPTL) Maria Paixao katak membru polisia mane la presiza fo protesaun ba polisia feto tanba sira iha knar ne’ebe hanesan maibe maske nune’e tenke respeita nudar feto ida.“Ha’u hanoin sira tenki partisipa iha aktividade polisia nian inklui operasaun tanba ita dehan katak ita hakarak akaba tiha kultura patriarkal, ne’e duni nia hanesan polisia labele obriga nia sa’e nuu, ne’e maka labele tanba nia feto nia iha kodrat maibe nia tuir operasaun sira ne’e normal no la presiza protesaun,” hateten Deputada Paixao, semana kotuk (17/02) iha PN.
Deputada Paixao mos fo ezemplu kona ba feto polisia ne’ebe susesu iha nia knar bainhira halo operasaun ba ema sira ne’ebe lori sasan illegal tama mai rai laran.
“Hau hakarak fo ezemplu ida, feto polisia ida ema lori sigaru mai husi fronteira tesik husi Suai mai to’o iha Ainaro polisia mane sira iha Ainaro la konsege kaer, mai to’o iha Aileu feto Komandante iha Sub-distritu aileu ninian halo opresaun kalan ho ninia feto maluk nain tolu nia konsege prende sigaru illegal ne’e no hau hasa’e duni nia pangkat tanba iha momentu neba hau nudar Administradora Distritu Aileu nian,” Paixao fo ezemplu.
Tuir nia, dalaruma feto (polisia) bo’ok aan lalais liu atu kaer ema ho taktik barak duke mane. “
“Ne’e duni laiha razaun katak feto ne’e la forsa no la barani. Kuandu feto polisia sira halo operasaun la’os liman mamuk maibe ho pistol ne’e hanesan sira nia forsa ida,” dehan Vise Presidente PN ne’e.
Iha lidun seluk Komandante Unidade Polisia Tranzitu Nasional, Superintendente Antonio L.C. Soares hateten iha Instituisaun PNTL tantu mane ka feto, liu-liu unidade tranzitu nian hala’o servisu hanesan hotu, kecuali isin rua.
“Isin rua fo toleransia atu labele halo servisu operasional iha terenu maibe kuandu nia normal hela nia tenki halo’o servisu, tantu ba operasional no iha area tranzitu,” nia katak.
Tuir nia, bainhira feto ida deside atu tama iha instituisaun military ka polisia nian, nia tenke pronto atu halo servisu saida deit hanesan ho mane sira maske servisu ne’e todan.